Shan Ramkulh Chaklei Ah TNLA Nih 1027 Operation An Kalpi Ṭhan Cang>>>>>>>

Shan ramkulh chaklei, Kyaukme le Nawnghkio peng ah SAC ralkap le TNLA kar a chuak mi kahdohnak kong he pehtlai in TNLA nih thawng thanhnak an tuah i Shan ramkulh chaklei ah 1027 Operation kan kalpi ṭhan cang, tiah phungning tein an langhter.

Nihin June 25, zinglei suimilam 5:30 hrawng ah Nawnghkio peng, Kyaukyan khua ah SAC ralkap le Ta’ang ralkap TNLA kar kahdohnak a fak i SAC ralkap nih vanlawng in kahdohnak an tuah i bomb voi 4 an thlak. Cu bantuk ṭhiamṭhiam in nihin zinglei suimilam 5:30 ah Kyaukme peng, Nyeinchanyikone ah SAC ralkap le TNLA kar ah kahdohnak a fak.

Mandalay ramṭhen, Mogok peng, Dawnankyitaung pawng ah TNLA le SAC ralkap kar kahdohnak a fak i Mogok–Mongmit lampi cung Thayetchaung hleipi cu SAC ralkap nih bomb puah in an chah. Lashio–Hsipaw kar Hsutlan khua hleipi zong ah bomb an puah i Kyaukme–Hsipaw kar Kyinthi hlei zong an khar, tiah theih a si.

CC Le CB Kaphnih Hruaitu Cu Remdaihnak Ser Ding Ah Mindat Council Nih An Duhnak An Langhter>>>>>>>>

Atu lio Chinram thlanglei Matupi khuapi i a linsa ngai mi kahdohnak kong he pehtlai in Mindat peng ah hrambunh mi Mindat Council nih Chinland Council hruaitu le Chin Brotherhood hruaitu cu tonbiaruaknak ngei in remdaihnak kawl ding ah an duhpiak hna kong nizan June 24 ah cathanh an chuah.

Matupi khuapi ah Chinmi mah le mah kar ah kahdohnak a chuak i kaphnih in thisen tiang a luang mi kan hmuh tik ah Mindat Council cu kan ngaih a chia i, kan lung a ṭha hrimhrim lo. Kaphnih hruaitu cu a rannak in remdaihnak ser i zuam hram u, tiah Mindat Council nih cun an cathanh ah an langhter.

Mindat Council nih cun, “Matupi peng chung ah mah le mah i kahdohnak pehzulh in kalpi a si ahcun Chinmi khat le khat kar ah buainak a karh in a ngan chin lengmang lai caah ramchung ramleng um mi hna nih dirkamh ti loin Chinram sersiam kho lo in a rawkral dih sual lai. Cucaah cun Matupi ah a cang cuahmah mi kahdohnak cu ngol in Chinland Council hruaitu le Chin Brotherhood hruaitu cu i tong ulaw a rannak in remdaihnak ser i zuam in Chinram sersiamnak lam kan kawlpiak hram ko u,” tiah Matupi kahdohnak daihter ding in an duhnak an langhter.