SAC Chairman General Min Aung Hlaing nih Central Command Commander Major General Kyi Khine le SAC ralbawi cheukhat, Major General hlun cheukhat cu zumh an tlak lo i zaam an i tim tiin a tlaih hna kong, SAC thawng laaknak hrampi le CDM Captain Zin Yaw nih an chim.
“Tlaih a tong mi SAC ralbawi pawl hi chekhlatnak an tuah hna lai i an rian in an dinhter hna lai ti a fiang. Major General Kyi Khine lawng si lo in Command GS Colonel, Central Command chungtel ralbawi, PSO le ralbawi dang an i tel. Second Command Commander belte cu aa tel lo. Colonel pawl an i tel hna i aa tel mi pawl fiang in theih thlu a si rih lo,” tiah CDM Captain Zin Yaw nih cun a chim.
Major General Kyi Khine nih Min Aung Hlaing thlak ding ah Major General hlun pawl le a zumh deuh mi ralbawi ngan pawl a auh hna i Nandwin ah tonbiaruahnak Min Aung Hlaing kong ceihmainak an ngei. Cu pin ah Naypyidaw ah nawlngeihnak laak ding kong tonbiaruahnak ngei in timhlamhnak an ngeih kong, CDM Capatain Zin Yaw nih a chim.
SAC Chairman nih a kuttang Command Commander pawl a zumh ngam ti hna lo caah Command GS le ralbawi ngan pawl a tlaih hna i Major General Kyi Khine zong tonbiaruahnak an ngeih dih ah Naypyidaw ah Min Aung Hlaing nih a kuttang pawl a tlaihter hna, tiah theih a si.
Tonzaang Peng Chung Ralzaam Hna Nih Zualral In Bawmhchanh An Herh>>>>>>>
Chinram, Tonzaang peng chung kahdohnak ruang ah innlo chuahtak a zaam mi hna cu zualral in bawmhchan an herh kong, Tonzaang Township Administration Board(TTAB) nih nizan June 26 ah an thanh.
A luancia May 15 ni thawk in a cang mi Tonzaang peng kahdohnak ruang ah Tonzaang peng tualchung mi 10,000 leng cu innlo chuahtak in a himnak hmun kawl in an rak zaam hna i a cheu cu an umnak hmun ah an kir cang nain tam deuh cu an kir khawh ve rih lo caah zualral in eidin tirawl le sii-ai bawmhchanh an herh ngai kong, Tonzaang Township Administration Board(TTAB) nih an thanh.
“Ralzaam mi hna le Tonzaang peng chung i zohkhenh hau tarnu tarpa le caan saupi a zaw cang mi hna cu Tonzaang Township Administration Board(TTAB) nih kan si khawh chung in kan bawmh ko hna nain atu cu eidin tirawl le sii-ai kong ah lungrethei ngaiin an um lio a si hna caah mizapi nih kutsamh in zualral in bawmhnak rak pe cio u,” tiah TTAB nih bawmhhalnak an tuah.
CDM a tuah mi ralzaam hna le tualchung mi chung in hartong, bawmhchanh hau taktak dirhmun a phan mi nih cun Tonzaang peng CDM Committee sin le Tonzaang Township Administration Board(TTAB) sin ah bawmh hal in theihternak kan tuah u, tiah TTAB nih an thanh mi ah an langhter.
Leave a Reply