Paletwa ah AA nih an Tlaih mi hna Chinmi Cheukhat an Konglam Theih a Si Lo

Thechinstar June 27

Chinram, Paletwa peng chung ah Rakhine hriamtlai AA nih an tlaih mi hna Chinmi cheukhat cu atu tiang an konglam theih a si lo, tiah tualchungmi nih a chim.

AA hriamtlai nih Paletwa peng an laak dih hnu ah tlaihkhihnak pehtlai in an tuah i, kan hnu May 17 ah khan Bawng-ku khuate ah pa pathum le Bawng-wi khuate ah pa paruk an rak tlaih hna, tiah Bawng-ku khuami pakhat nih The Nation Voice ah a chim.

AA tlaih mi Bawng-ku le Bawng-wi khuami minung 9 laak ah hin sianginn cachimtu pahnih zong an i tel. Hi minung 9 chung ah hin minung 2 cu an luat cang, tiah tualchungmi pakhat nih a chim.

“Minung pahnih cu an luat cang. A dang cu atu tiang an luat rih lo. Zei ruang ah dah atu tiang an tlah hna lo ti mi kan thei lo,” tiah tualchungmi pakhat nih a chim.

Kan hnu April 22 zong ah khan Ta-man-thar le Tain-let-wa khua in khual a tlawng mi Chin nu pakhat le a dang pa pathum cu lampi ah AA nih an tlaih hna i cu ni thawk cun an konglam theih a si ti lo.

“AA nih an tlaih hna hnu in an thawngpang kan thei ti lo. Chungkhar nih mitthli he AA sin ah an kong an hal hna nain kan thei lo tiah an leh hna. Chungkhar pawl an lungre a thei tuk. Atu tiang an thawngpang zeihmanh an thei rih lo,” tiah tualchungmi pakhat nih The Nation Voice ah a chim.

“Atu June 18 zong ah Paletwa peng, Sa-chaung khua ah AA nih minung pakhat an tlaih chap. Micheukhat cu AA nih an inn ah an kal hnawh hna i an tlaih hna. Micheu cu khualtlawnnak lampi zong ah tlaih an tong,” tiah Paletwa hartong bawmtu bu chungtel pakhat nih a chim.

Paletwa ah AA nih Chinmi pawl an tlaih lengmang hna caah atu June 4 le 10 ah khan Global Khumi Organanization le Chinland Council nih Paletwa peng chung mipi hna cung AA nih harnak pek lo ding in le tliahkhihnak tuah lo ding in cathanh zong an rak chuah.