CYLA Nih Lawngtlai In Paletwa–Rakhine Lei Pehtlaihnak Lampi An phih Nak Kong He Petlaih In AA Lei In Lehnak An Tuah

Central Young Lai Association (CYLA) nih AA sin a lut ding petrol le diesel phikhamnak a tuah mi cu an pehzulh peng i, “Rakhine ralkap AA nih Chinram ah kahdohnak an ngol hlan lo cu Lawngtlai in Paletwa–Rakhine lei pehtlaihnak lampi kan phih lai,” tiah an thanh. Hi kong ah United League of Arakan/Arakan Army (ULA/AA) chimnak nawlngei Khine Thukha nih cun, “Myanmar ram buainak ah CYLA cu an i tel ve awk hrim a si lo,” tiah The Irrawaddy ah a chim.

“Myanmar ram buainak kong i CYLA an i thlak ve nih hin buainak lam a karhter chin. Hi bantuk India ram chung bu pakhat nih Myanmar ram chung buainak i aa thlak ve mi hi cu cohlan awk a ṭha lo mi a si,” tiah ULA/AA chimnak nawlngei Khine Thu Khah nih cun a chim.

CYLA lei nih AA cu Chinram chung ah kahdohnak tuah lo ding in le Chinland Council ralkap he i kap lo ding in atu le atu an nawl hna nain AA lei nih lehnak zeihmanh an tuah lo caah India le Myanmar chawlehnak lampi cu a luancia June 24 ni thawk in CYLA nih an phih i a bik in Arakan Army sin ah Petrol le Diesel a lut ding mi cu CYLA nih an kham dih. AA nih Chinram ah kahdohnak an ngol hlan lo cu phihkhamnak an tuah peng lai kong CYLA President HC. Vanlalruatpuia nih a chim ve.