Matupi Khuapi Kahdohnak Ah A Zaam Mi SAC Ralkap 120 Hrawng Hriamnam He An Tlaih Hna Kong CB Nih An Thanh
Chinram, Matupi khuapi kahdohnak ah a zaam mi SAC ralkap 120 hrawng cu hriamnam tam ngai he an tlaih hna kong le a zaam i a luat mi SAC ralkap pawl pehzulh in an fimhlawm hna kong, Chin Brotherhood nih nihin July 28 ah cathanh an chuah.
“A luancia June 29 ni ah khan Matupi khuapi ah a um mi Khah-Mah-Yah 304, Khah-Lah-Yah 140 le Byuha sakhan cu AA hruai mi CB ralkap nih an rak laak hnu ah a zaam mi SAC ralkap, an chungkhar pawl le zung rianṭuan 120 hrawng cu July 17 ni ah an hriamnam he kan rak tlaih hna. Cu bantuk ṭhiamṭhiam in July 25 ni ah a zaam mi SAC ralkap pawl he suimilam 2 chung hrawng kan i kah hnu ah SAC ralkap zeimawzat kan tlaih chap hna i a zaam mi cheukhat zong kan fimhlawm hna,” tiah Chin Brotherhood nih an thanh.
“Kan tlaih mi hna SAC ralkap pawl le an chungkhar pawl cu eidin tirawl a ngei lo mi le i thlopbulnak sii-ai a ngei lo mi an si caah ṭha tein kan thlopbul hna i tirawl kan pek hna. Kahdohnak ah hliamfak tuar in a thi mi cheukhat zong an um. Kan tlaih mi hna hi phung he aa tlak ning in ṭha tein kan zohkhenh hna,” tiah Chin Brotherhood nih an langhter.
Chinram, Hakha–Thantlang kar i a um mi Auto tlang SAC ralkap sakhan cu Chinland Council ralkap nih Tilim Operation 4 ni 7nak ah a ningpi in an laak i hriamnam tam ngai zong an laak, tiah theih a si.
Nihin July 28, zinglei suimilam 4:30 hrawng ah khan Hakha–Thantlang kar i a um mi SAC ca ah a biapi ngai mi Auto tlang sakhan cu Chinland Council ralkap nih a ningpi in an laak khawh. Auto tlang sakhan ah cun SAC Division 77 kuttang Battalion pawl umhmun an khuarnak a si i kaphnih kar kahdohnak ah SAC ralkap 15 an thi i minung pahnih an tlaih hna. Cu sakhan kahdohnak ah cun CC ralkap nih RPG le 60mm telh in hriamnam tam ngai an laak, tiah theih a si.
A luancia July 22 ni ah thawk mi Tilim Operation 4 kahdohnak zarh khat chung ah hin Chinland Council ralkap nih Hakha–Thantlang kar ah a um i SAC ca ah a biapi ngai mi Lungkhar tlang sakhan le Auto tlang sakhan telh in SAC ralkap sakhan 7 hrawng an laak cang. Atu tan Tilim Operation 4 kahdohnak ah hin SAC ralkap thi le hliam an tam i mahte in aa ap mi le tlaih mi zong an um. Cu pin ah CC ralkap nih hriamnam tam ngai an laak kong le Thantlang khuapi ah a um mi SAC ralkap sakhan pehzulh in kah an timh kong, CNF/CNA chimnak nawlngei Salai Htet Ni nih Online biaruahnak ah a chim.
“Kan rak sungh ṭhan mi Auto tlang sakhan le Lungkhar sakhan zong Pathian nih a kan pek ṭhan cang. Hi sakhan hi kahdoh bawmhnak kong ah a biapi ngai mi sakhan an si i atu ah cun kan kut ah a um cang. Auto le Lungkhar kan laak cang i Thantlang kan kah tik zong ah Hakha lei in motor in ralkap thazaang chap in kahdoh bawm ding ah an ra kho ti lai lo, kan ralkap hna ca ah hnangam ngai a si. Atu tan Thantlang khuapi laak timh mi cu a hlan i kan rak i harh bantuk khan cun kan i harh ti lai lo,” tiah CNF/CNA chimnak nawlngei Salai Htet Ni nih cun a chim.
Hakha–Thantlang kar ah kalpi cuahmah mi Tilim Operation 4 kahdohnak ah hin Chinland Council ralkap in hliam a tuar mi zong an um ve i CC ralkap 10 hrawng nih ram le miphun ca ah an nunnak an pek cang, tiah theih a si.
Leave a Reply