Thawngpang Tha : Matupi In A Zaam Mi SAC Chungtel 80 Deng Chinland Cozah Ralkapbu Nih An Tlaih Hna >>>>>>

Chinram thlanglei, Matupi khuapi laak kahdohnak in a zaam mi SAC ralhrang chungtel 80 deng cu Chinland Cozah ralkapbu nih an tlaih hna kong, CDF-Matupi Brigade-2 sin in theih a si.

Matupi khuapi in a zaam mi SAC ralhrang chungtel pawl hi voi khat tlaih ah a bu in an tlai hna lo. Nifate ti-awk in minung 2, 3, 10 tiin an tlaih hna i nikhat chung ah an tlaih a tam bik cu 40 hrawng an si, tiah kan theih.

“Nihin tiang kan tlaih mi hna SAC ralhrang pawl cu 70 in 80 kar an si cang. Voi khat tlaih ah kan tlaih mi hna an si lo. Voi khat tlaih ah 2, 3 tiin kan tlaih hna caah fiang tein chim a har ngaingai. Voi khat tu cu 40 dengmang voi khat tlaih ah kan tlaih hna. Matupi khuapi in ramtang in an rak zaam caah lam an tlau i eidin ding zong an ngeih ti lo. Kan tlaih hna lo hmanh ah ramtang ah a thi dih kho mi an si,” tiah CDF-Matupi Brigade-2 in chimnak nawlngeitu nih a chim.

Atu bantuk in tlaih a tong mi hna lak a tamdeuh cu hriam a tlai mi SAC ralhrang chungtel an si ko nain lehrul nakding ah an thinlung a der ngai cang kong, meithal puah lo in an tlaih hna kong, cu chung ah SAC ralhrang chungkhar pawl zong an i tel kong le mah hna pawl sin in meithal zuun 40 leng an laak kong zong theih a si.

“Tlaih a tong mi hna lak ah a tamdeuh cu hriam aa tlaih mi an si i kum upa cang mi zong an i tel. Hriamnam hmanh aa put kho ti lo mi zong an i tel. Kan va kal lio ahhin lehrulh cu chim lo an kut an thlir dih i an i ap colh. An thinlung a rak deng ngaingai cang. Cheukhat cu an kal kho ti lo. An ke zong a hma dih. Atu tiang ahcun anmah pawl sin in meithal 40 leng 50 tluk deng kan laak cang,” tiah a chim chap.

“Tlaih a tong mi hna sin in kan theih mi cu an bawi le nih kan rak in don hna lai an ti hna i ruahchannak an pek hna. Asinain an don khawh hna nakding lam a um lo. An bawi le nih an tuah khawh bik mi cu kahdohnak a um caan ah cunglei in rak kah bawmh le hriamnam rak thlakpiak lawng a si ko. Mah pawl hi kan zoh tik ah SAC ralhrang pawl hi zeitluk in dah an thazaang nih a daih ti lo ti mi theih khawh a si,” tiah CDF-Matupi Brigade-2 in chimnak nawlngeitu nihcun a chim.

Tlaih a tong mi SAC ralhrang le an chungkhar pawl cu ralkap phungning tein an zohkhenh hna i sii-ai zong in an thlopbul hna, tiah theih a si.