Kan hnu zarh Cawnninga ni, August 9 ah khan Brazil ram, Sao Paolo state ah khualtlawng phur vanlawng pakhat a tla i, vanlawng cuang mi 58 le riantuantu 4 cu an thi dih.
Voepass Airlines nih a langhter ning ah, Vanlawng hi Guarulhos international airport in a chuak i, a chuah tlawmpal ah Sao Paolo state chung, Vinnhendo khua ah a tla. Vanlawng hi minung umnak hmunram ah a tla nain vanlawng chung cuang mi dah ti lo minung thi le hliam an um lo.
Vanlawng tlak thawngpang theih a si sinin bawmchantu phu nih an zuanhnawh colh hna i, Brazil ram caan in zanlei suimilam 6:30 hrawng ah an rian an lim khawh. Ruak 62 zong laak khawh dih an si, tiah Sao Paolo state chimnak nawlngei nih cun a chim. A thi mi hi pa 34 le nu 28 an si i, mithi ruak hna cu forensic department nih zohfel ding ah an laak colh hna.
Sao Paolo public security secretary pa nih cun, vanlawng chung ah a um mi ‘black box’ zong an laak khawh i, vanlawng nih accident a ton ning fiangfai tein theih khawh a si zau lai kan zumh, tiah a chim.
Hi bantuk vanlawng accident hi a luancia 2023 January thla ah khan Nepal ram ah a rak cang bal i, cu lio ah cun minung 72 nunnak a rak liam. Cu lio thilcang kong ah vanlawng mawngtu pilot cu mawhphurh a rak a si cem. Nepal ram i vanlawng a tla mi le atu Sao Paolo i vanlawng a tla mi ATR 72 veve an si.
Leave a Reply