Myanmar ram buai ruang ah Chinram in Mizoram ramkulh, Lawngtlai pengkomh, Sangau khua ah aa dor mi ralzaam hna nih atu lio ah kalpi cuahmah mi Tilim Operation 4 ca ah bawmhnak an pek, tiah theih a si.
Pau dohthlennak ah biatak tein a cawlcang i kut a samhtu Sangau khua ah aa dor mi Chin ralzaam hna nih cun Tilim Operation 4 ca ah tiin tangka an pek mi in ṭuanvo ngeitu nih Facang (50kg) tun 22 le Chiti box 10 (box 1 ah bawm 12 a um mi) cu an cawk i nizan August 21 ah Chinland Council ralkap sin ah tlamtling tein an va pek hna kong, ṭuanvo ngei pakhat nih The Chin Post ah a chim.
A luancia July 28 ni zong ah khan Sangau khua ah aa dor mi Chin ralzaam hna nih hin Tilim Operation 4 ca ṭhiam ah tangka Kyats 1,174,000 le Rupees 44,350 an rak pek cang. Cu bantuk ṭhiamṭhiam in August 3 ni zong ah khan Sangau Ralzaam Mino Chiatṭhat Bu (SRMCB) – 2023-2024 nih Tilim Operation 4 ca ah tiin tangka Kyats 1,200,000 cu Chinland Council ralkap sin ah an rak pek kong, ṭuanvo ngeitu nih an chim.
ICNCC, CB Le ZORO Cu Tlamtling Tein Tonbiaruahnak An Ngei Kho>>>>>>>>>
Mizoram ramkulh, Aizawl khuapi ah ICNCC, Chin Brotherhood le Zo Reunification Organization (ZORO) phu cu nizan August 21 ah tlamtling tein tonbiaruahnak an ngei kho, tiah theih a si.
Nizan August 21, chun suimilam 12:00 ah ZORO Headquarters ah ICNCC, CB le ZORO hruaitu pawl cu tonbiaruahnak an ngei i atu lio Chinram chung i Chin hriamtlai phu kar buainak an i ceihmai kong, ZORO nih an thanh.
Chinram chung ah Chinland Council, Chinram cozah le ICNCC, CB tiin an kar ah i hmuhthiam lonak a um caah kaphnih i kahdohnak tiang a chuak tawn mi cu ZORO nih an duh hrimhrim lo kong le mah unau le unau remdaihnak he lungrualte tu in hmun khat umṭi ding an si kong, ZORO nih an langhter.
“Kan zate in unau kan si i i ṭhen awk kan ṭha lo. Mah le mah i kahdoh kong zong ah fak deuh in ruah a hau. Kan hrihhram aa khat i unau dih kan si hna caah Pathian zong nih nikhat khat cu a kan fonh te lai zong ka zumh. Cucaah cun remdaihnak he lungrual tein um hi kannih nih kan duh mi cu a si i cucu kannih nih kan dirpi zong a si fawn caah atu bantukin daihnak ser ding in kan in tlangtlaknak hna hi a si,” tiah ZORO Secretary Pu L. Ramdinliana Renthlei nih a chim.
ICNCC hruaitu Pu Lian Luai zong nih, “Atu bantukin ZORO nih Chinmi kong he pehtlai in nan kan tawlrelpi mi cung ah kan i lawm, mah le mah kar i lungrualnak a chuah khawh nakhnga hi hnu pinlei zong ah rak kan sawm tawn u,” tiin lunglawmhnak bia a chim ve, tiah ZORO nih an langhter.
CNO/CNDF chimnak nawlngei Salai Timmy Htut nih cun, “Nihin i tonbiaruahnak kan ngeih mi cu a hramthawk karhlannak a si i Chinmi lungrualnak cu kan herh tuk mi a si. Cu bantuk lungrualnak kan duh caah cun a kan kaptu hmanh kan kah hna lo cu. Chinmi kar i a dik mi lungrualnak a chuah khawh nakding a si ahcun kanmah le kan phu cio i kan sinak vialte zong hi hloh dih in a hramthawk tein kan dirh ṭhan zong a herh,” tiin a chim ve, tiah ZORO nih cun an langhter.
ZORO nih cun Chinland Council, Chinram cozah le ICNCC, Chin Brotherhood kar i a cang mi i hmuhthiam lonak ruang i a chuak mi buainak kong ah remdaihnak a chuah khawh nakhnga pehzulh in kan i zuam ko lai, caan rem a um tik ah cabuai cung ah remdaihnak kong ceihmainak kan tuah lai, tiah an langhter.
Leave a Reply