Mandalay ramṭhen, Nyaung-U pengkomh, Kyaukpadaung khuapi in SAC kuttang Deputy Police Chief pakhat cu CDF-KKG sin ah aa fonh kong, CDF-KKG nih an thanh.
Nihin August 23 ah Nyaung-U pengkomh, Kyaukpadaung khuapi Myoma palik sakhan in Deputy Police Chief pakhat cu ṭuanvo ngeitu a pehtlaih hna hnu ah a chungkhar he CDF-KKG sin ah an i fonh, tiah theih a si.
Chinland Defense Force – Kalay Kabaw Gangaw sin ah aa fonh mi Deputy Police Chief le a chungkhar cu CDF-KKG nih a himnak hmun ah an umter hnanak kong an thanh mi ah an langhter.
Tilim Operation 4 Ca Ah Thantlang, Sianginn Sang US Um Mi Nih Vok Pathum An Pek>>>>>>>>>>>>>>>>
Chinram, Thantlang khuapi, sianginn sang ah a rak um i US ah a kal mi sianginn sang chungtel hna nih atu lio ah kalpi cuahmah mi Tilim Operation 4 ca ah vok pathum an pek, tiah theih a si.
US ah a um mi sianginn sang chungtel hna nih zaanghlei cawi in an thawh mi tangka cu Tilim Operation 4 ca ah ral a tu cuahmah mi Chinland Council ralkap hna nih an ei awkah tiin Kyats 3,900,000 man vok thum cu ṭuanvo ngeitu nih an cawk hnu ah CDF-Thantlang sin ah an pek hna kong, ṭuanvo ngeitu nih an chim.
“Tilim Operation 4 ca ah sianginn sang US um mi nih vok pathum in nan kan dirkamhnak cung ah kan i lawm tuk hringhrang. Pathian nih ram le miphun ca ah in hmang chin ko hna seh,” tiah Chinland Defense Force – Thantlang nih an lunglawmhnak an langhter.
ZRA Sin Ah Training Kai Hrimhrim Lo Ding Tiah CDF-Tonzaang Nih Ralrin Peknak Tuah>>>>>>
Chinram, Cikha khuapi ah ZRA nih an tuah mi training ah ahohmanh kai hrimhrim lo ding, a kai mi nan um ahcun fak piin dantat nan si lai, tiah Tonzaang peng hrambunh Chinland Defense Force – Tonzaang nih nihin August 23 ah ralrin peknak an tuah.
Cikha khuapi ah CDF-Tonzaang nih sakhan an chiah lo mi cu ZRA nih caan ṭha ah rak i laak i Zomi ti mi min in lih le hrokhrawl in tualchung mi sin ah an um i tualchung mi an hlen hna i an lemsoi pin hna ah Pyituhsit training tiang kaiter an timh hna, tiah CDF-Tonzaang nih an langhter.
Zomi Revolutionary Army – ZRA cu SAC ralkap he ṭangṭi an si pin ah mah miaknak lawng bak a kawl i hriam a tlai ve sawh mi an si caah atu i training an tuah mi kai hrimhrim lo ding, tiah CDF-Tonzaang nih theihternak an tuah.
CDF-Tonzaang telh in Chinland Council ralkap nih Tonzaang peng cu a ningpi in an rak laak hnu ah Tonzaang khuapi le a peng chung ah Tonzaang peng Council nih zatlang ukhruainak an kalpi i tualchung mi he rualrem tein an um hna, tiah theih a si.
Leave a Reply