Mon Ramkulh Hriamtlai Phu Thum I Fonh Ding In Hnatlaknak An Ngei>>>>>

Mon ramkulh hriamtlai phu thum a si mi Mon State Federal Council(MSFC), Mon State Revolutionary Force(MSRF) le Mon State Defence Force(MSDF) cu SAC ralkap nawlngeihnak a hram bongh ding ah kahdohnak ah ṭangṭi ding in hnatlaknak an ngeih kong nizan April 7 ni ah an thanh.

“Mon ramkulh hriamtlai phu pawl he i fonh in kahdohnak ah ṭanṭi a herh caah atu bantukin hnatlaknak kan ngeihnak a si,” tiah Mon Ramkulh Federal Council(MSFC) ukhruaitu Committee Chairman Naing Mon Sai nih a chim.

“Ramkhel lei zong ah i fonh kan hau, ramkulh dang he tahchunh ahcun dirhmun ṭha cu kan phan rih lo, aa khat lo mi ramkhel thazaang hmunkhat ah kan i fonh kho rih lo, kan zapi in ningcang a ngei mi khuakhan thiamnak kan ngeih dih a herh,” tiah Naing Mon Sai nih cun a chim.

Mon ramkulh hriamtlai phu thum nih hnatlaknak an ngeih bantukin MSDF in ṭuanvo ngei cheukhat cu MSFC ah an i fonh i ramkhel lei rianṭuanṭinak ngei in MSDF le MSRF cu kahdohnak ah ṭangṭi ding in hnatlaknak an ngei.

Raltuknak kong he pehtlai in MSDF le MSRF cu ralkap training le hriamnam serchuah ding rian ṭuanṭi in le kahdohnak ah ṭangṭi ding in hnatlaknak an ngei, tiah theih a si.