Magway ramṭhen, Ngape peng ah a um mi kum upa ngai cang mi Chinmi pa pakhat cu SAC ralkap nih an tlaih i an kalpi hnu ah an thah, tiah tualchung mi nih an chim.
August 29, zanlei suimilam 6:00 hrawng ah khan Ngape peng, Azar khua i a um mi Chinmi pa pakhat cu leikuang i a um lio ah rallam sial mi SAC ralkap pawl nih an tlaih i an kalpi hnu ah an thah, tiah theih a si.
Tlaih a tong mi Chinmi pa pakhat cu August 31 ah Satsi khua le Azar khua kar leikuang ah rallam sial mi SAC ralkap pawl nih an thah i an phum mi a ruak cu khua mi nih an hmuh ṭhan kong, Azar khua i a um mi Chinmi pa pakhat nih a chim.
“August 31, chun suimilam 12:00 hrawng ah khan ruak hi an hmuh ṭhan i a ruak ah bomb an hmanh sual lai phan ah ahohmanh nih an char ngam colh lo. An hremnak hliamhma zong a tam ngai. Thilpuan zeihmanh hruk lo in an phum mi a ruak cu an hmuh ṭhan,” tiah Azar khua i a um mi Chinmi pa pakhat nih cun a chim.
Thah a tong mi kum 60 leng Chinmi pa pakhat cu leikuang ah pawcawmnak kawl in rian a ṭuan mi tualchung mi sawhsawh a si, tiah Kimo Media nih a ṭial.
Tigyaing Khuapi Lei Ah A Kai Mi SAC Raltuknak Tilawng Pahnih An Hrawh Khawh>>>>>
Sagaing ramṭhen, Tigyaing khuapi lei ah a kai mi SAC taltuknak tilawng pawl cu KIA le PDF ṭangṭi phu nih an kah i dot hnih tilawng pahnih an hrawh khawh kong, KIA thawng laaknak hrampi nih an chim.
Nizan September 1, zanlei suimilam 5:00 hrawng ah Tigyaing khuapi lei ah a kai mi SAC raltuknak tilawng 5 lak ah pahnih cu Tigyaing le Myataung kar ah KIA le PDF ṭangṭi phu nih hriamngan in an kah i a pahnih ning in a kaang, a dang pathum cu ti lai ah an dir i ṭangṭi phu nih pehzulh in an kah, tiah theih a si.
“Thlanglei i Tigyaing lei ah a kai mi SAC raltuknak tilawng 5 lak ah pahnih cu Tigyaing le Myataung kar ah KIA ṭangṭi phu nih an hrawh khawh. A dang pathum cu ti lai ah a dir i pehzulh in an kah cuahmah,” tiah KIA thawng laaknak hrampi nih an chim.
Tigyaing khuapi lei ah a kai mi SAC raltuknak tilawng chung i a um mi SAC ralkap pawl nih cun tivapi kam i a um mi khua pawl ah pehtlai in hriamngan an kah peng, tiah theih a si.
Leave a Reply