SAC Nih Mindat Khuapi Ah Vanlawng In Hriamnam An Thlak Ṭhan
Chinram thlanglei, Mindat khuapi ah hrambunh mi Khah-Lah-Yiah 274 Battalion SAC ralkap sakhan ah SAC nih vanlawng in hriamnam le eidin tirawl an thlak ṭhan, tiah theih a si.
Nihin September 3, chun suimilam 12:00 hrawng ah khan SAC Y-12 thil phurhnak vanlawng cu Mindat khuapi cung aa hel i Khah-Lah-Yiah 274 Battalion SAC ralkap sakhan ah hriamnam le eidin tirawl a thlak ṭhan, bawm 3 a thlak cang, tiah Mindat peng thawngzamhtu Hkl-Mindat nih a langhter.
A luancia August 28 ni zong ah khan SAC nih Y-12 vanlawng ṭhiamṭhiam in hriamnam le eidin tirawl an phurh mi cu Parachute in Mindat khuapi hrambunh Khah-Lah-Yah 274 Battalion sakhan ah hin an rak thlak cang.
Kanpetlet Peng Khuate Cheukhat Ah Ralkap Tlakter Ding Ah CDF-Kanpetlet Nih Hramhram In Mino An Tlaih Hna Tiah An Thanh>>>>
Chinram, Kanpetlet peng, Circle 5 hmunram chung khuate ah khua khat ah minung 5 ralkap tlakter ding in CDF-Kanpetlet nih hramhram in mino an tlaih hna, tiah Kanpetlet peng, No.5 chung um tualchung mi nih September 1 ah cathanh an chuah.
Kanpetlet peng Circle 5 khuate i a um mi mino pawl cu CDF-Kanpetlet nih ralkap tla ding in nawl an pek hna, hriamnam he an hrocer hna i an ṭhihpeih hna. Ralkap tlak hrimhrim ding ti mi phung an hman i hramhram in mino an khawmh hna, tiah Kanetlet peng, No.5 chung um tualchung mi nih an langhter.
A luancia August thla zarh hnihnak ah khan Kanpetlet peng, Makyar, Tonnge le Kharpan khua ah mino 11 an tlaih hna i AA ralkap training sianginn ah an kalpi hna. Mipi hnatlaknak tel lo in hramhram in ralkap tlakter, nuhrin covo buar in pehzulh in thilsual nan tuah mi ruang ah buainak a chuak mi cu ṭuanvo ngeitu nih tlamtling tein ṭuanvo nan laak dih a hau lai, tiah No.5 chung um tualchung mi nih cun an langhter.
Kanpetlet peng ah Rakhine ralkap AA nih umhmun an khuar i kahdohnak an tuah mi kong he pehtlai in Kanpetlet peng mipi nih an hmunram chung ah AA ralkap um lo ding in September 1 ah khan duhlonak cathanh an chuah.
Kanpetlet peng, No.5 chung i a um mi tualchung mi nih cathanh an chuah mi kong he pehtlai in Chin Defence Force – Kanpetlet nih zeibantuk cathanh hmanh an chuah mi a um rih lo i mipi sin ah fianhnak an tuah mi hmuh ding a um rih lo.
Kamkhat lei ah Kanpetlet peng mipi ukhruaitu phu le Chin Defence Force – Kanpetlet nih cun, “ULA/AA nih unau kan sinak lungput he Chinram luatnak ding ca ah a lam kip in nan i zuamnak, Kyatwee khuapi kahdohnak ah ralkap thazaang le hriamnam in nan kan telpinak cung ah siseh nunnak le pum cheu a petu AA ralkap pakhat cio nih an i pekchanhnak cung ah kan i lawm tuk hringhran, tiah August 30 ah khan an lunglawmhnak cathanh an chuah ve.
Leave a Reply