Naunghkio peng, Taungkham um SAC hriamngan ralkap phu pawl an kah hna lio muicawl cu TNLA nih September 4 ah an thlah.
Operation 1027 a dal hnihnak, Taunghkam kahdohnak an langhter hi a si i TNLA nih SAC ralkap sin in an lak khawh mi Tank pahnih an hman kha muicawl chung ah hmuh khawh a si.
September thla zarhkhatnak ah Commander In Chief Ta Ma Waw le Brigade Commander Ta Maw Shan hruainak in Kyaukme le Naunghkio peng, Taunghkhan khuakomh um SAC hriamngan ralkap 206, 354, 406, 902 ah a cang mi kahdohnak muicawl pawl TNLA nih an thlah hi a si.
Cu muicawl chung ah kahdohnak dirhmun pawl an langhter hi a si i kahdohnak chung ah a thi mi SAC ralkap pawl ruak zong hmuh khawh a si.
Cun SAC ralkap sin in an lak khawh mi hriamngan, hriamhme pawl zong an langhter.
Taunghkan kahdohnak ah TNLA lei bawmtu ralkap pawl an kal lio kha an langhter i SAC sin in an lak khawh mi Tank 2 zong TNLA ralkap pawl sin ah hmuh khawh a si.
Tuluk ram nih TNLA cu kahdohnak daih ter ding in ca a kuat ko nain TNLA nih SAC ralkap cu pehzulh in a kah hna.
August 29 ah TNLA sin ah kahdohnak daihter ding in ca a phan, kahdohnak nan daihter lo ahcun nan tuar lai tiah an tlerh hna hi a si.
Cubantuk Tuluk tlerhkhawnnak kong he pehtlai in TNLA nih phungning tein calehnak a tuah mi a um lo nain August 29 hnu ah Taunghkan kahdohnak a can ṭhan hi a si.
Cun August 30 ah Tuluk palai le TNLA lei tonnak an ngei tiah TNLA chimphuannak nawl a ngeitu Nway Yay Oo nih a chim.
“August 30 ah tonnak an ngei. Adang phu an i tel le tel lo theih a si rih lo. Khoika dah an i ton i zeikong dah an ceih zong a fiang in theih a si rih lo” tiah Nway Yay Oo nih a chim.
TNLA nih Taunghkan um hriamngan ralkap 206, 406 hna cu August 28 ah a lak khawh. Cun a tang mi hriamngan ralkap phu 902 le 354 hna zong la kho ding in aa zuam lio tiah theih a si.
September 3 ah 902 le 354 karlak ah kahdohnak a fak i hmunhma tampi cu TNLA nih an lak khawh cang tiah TNLA chimphuannak nawl a ngeitu Nway Yay Oo nih People’s Spring ahcun a chim.
Leave a Reply