Mizoram, Siaha pengkomh, Zawngling khua ah April 5 ni ah khan Assam Rifiles nih Myanmar ram mi pahnih le India ram mi pathum kut in Kyats 77,474,500 le Rupees 101,015 an tlaih.
Mizoram, Siaha pengkomh, Zawngling khua ah April 5 ni ah khan Assam Rifiles nih Myanmar ram mi pahnih le India ram mi pathum kut in Kyats 77,474,500 le Rupees 101,015 an tlaih.
Siaha pengkomh thlanglei, Zawngling khua ah minung 16 nih an i cit mi motor cu Assam Rifiles nih chekhlatnak an tuah i, motor chung ah Myanmar ram mi pahnih le India ram mi pathum nih an phurh mi Myanmar tangka le India tangka aa cawh mi cu an tlaih.
Assam Rifiles sin ah thawngpek a si bantukin chekhlatnak an tuah i Zawngling khua ah tangka phurtu cu an tlaih hna, tlaih a tong mi hna cu an phurh mi tangka he Tuipang Police Station ah an kuat hna.Thawngdang
Chin State People’s Police Force Special(CSPPF) nih Chinram chung ah dirh mi palik rianṭuannak ah lutlai a si mi, peng kip palik bawi hna nih hngalh ding palik he aa pehtlai mi phunglam hna le i ukhruainak cawnnak an ngeih mi cu tlamtling tein an tuah khawh kong nizan April 7 ah an thanh.
Chinram chung mizapi palik phu nih palik rianṭuannak le phunglam, peng kip palik bawi hna nih hngalh ding mi rianṭuan ningcang le i ṭhithruainak he aa pehtlai mi cawnnak Special Training cu a luancia March 28 ni ah an rak thawk i, cu Training ah cun peng kip um palik bawi, palik bawi chang le palik zung in ṭuanvo ngei minung 16 an i tel kho.
CSPPF nih an tuah mi Training ah cun pumpak in aa tel kho lo mi palik hna zong Zoom in an i tel kho i, tu thla April 5 ni ah tlamtling tein an tuah khawh. Training dih ni ah cun Chinram chung peng kip palik bawi, Training petu hna le ṭuanvo ngeitu hna an i tel khawh kong CSPPF nih an thanh.
CSPPF nih Chinram peng kip um palik bawi le hmunram zohkhenhtu palik chungtel dihlak nih rianṭuan an thiam nakhnga le hmailei kar an hlannak ca ah hngalh a herh mi Special Training pehzulh in tuah an i timh kong nizan April 7 ah mizapi sin ah an thanh. Chin State People’s Police Force Special(CSPPF) cu ICNCC tangah a um mi palik phu an si.Thawngdang
Sagaing ramṭhen, Shwebo peng, Shartaw khua mi 5 cu SAC ralkap nih an thah hna i inn 400 leng an khangh.
April 6 ni ah SAC ralkap cu Shwebo peng, Shartaw khua ah rallam sial in an lut i khua mi U Win Khin, U Ung Maung, U Naung Naung Htun, U Soe Aung le Daw Nyunt Yin cu an tlaih hna i an thah hna hnu ah inn 400 leng an khangh, tiah theih a si.
“Thah a tong mi hi minung 5 an si i kum 80 cung le kum 90 cung a zaam kho lo mi tar pahnih cu meikhangh in an thah hna, a zeng mi pakhat telh in minung pathum cu meithal in an kah hna hnu ah tikhur ah an thlak hna, khuapi ning ti tluk in inn an khangh i inn tlawmte lawng a kaang lo mi a si,” tualchung mi pakhat nih a chim.
“Cu pin ah April 5 ni ah Magway ramṭhen, Pauk peng, Shwelan khua ah SAC ralkap pawl rallam sial in an lut i inn 20 leng an khangh, tualchung mi cu a himnak hmun kawl in an zaam dih,” tiah tualchung mi pakhat nih cun a chim.Thawngpang Dang Rel Than
Maungdaw peng, ramri hngak SAC ralkap No.24 Byuha sakhan cu Rakhine ralkap AA nih nihin April 7 zinglei ah an laak i SAC ralkap nih Maungdaw le Buthidaung peng ah ralkap thazaang an chap, tiah tualchung mi nih an chim.
“No.24 Byuha sakhan cu SAC ralkap le palik nih caan saupi chung an hngah cang mi hmun a si i AA nih April thla thawk ah kah hram an rak thawk i nihin April 7 ah an laak, hriamnam chiah an fial ko hna nain an duh lo caah an kah hna, SAC ralkap pawl cu Kyeinchaung khua lei ah an zaam,” tiah Maungdaw peng tualchung mi pakhat nih a chim.
No.24 Byuha sakhan in a zaam mi SAC ralkap le palik pawl cu Kyeinchaung khua, ramri hngak SAC palik Company 7 sin ah an i fonh, tiah theih a si.
A luancia March 11 ni zong ah Maungdaw peng Aungtharpyi ramri hngak pawl nih an hriamnam an chiah duh lo ruang ah AA nih an rak kah hna i ramri hngak palik 180 hrawng Bangladesh ram ah an zaam i AA nih hriamnam tam ngai an rak laak.
Atu ah cun Maungdaw chaklei Kyeekanpyin ramri hngak Headquaters lawng a taang cang i AA nih an erhkhumh hna, SAC ralkap nih Buthidaung–Maungdaw hmunram ah tilawng hmang in ralkap thazaang an chap ve, tiah theih a si.
“Maungdaw–Buthidaung motor lampi zong AA nih an uk dih cang i SAC lei nih hin vanlawng in kahdohnak an tuah peng ve,” tiah tualchung mi pakhat nih a chim.
Leave a Reply