Myawaddy Hrambunh Khah-Lah-Yiah 275 SAC Chungtel 100 Leng Cu Hriamnam Chiah Ding In Ceihmainak An Tuah Pi Hna. Karen ramkulh, Myawaddy khuapi hrambunh Khah-Lah-Yah 275 in SAC ralhrang chungtel 100 leng nih hriamnam an chiah cang tiah kahdohnak hmun thawng latu hrampi nih Khit Thit Media ah a chim.
“Hriamnam chia mi 400 tluk an si cang, midang pawl zong ceihhmainak pehzulh in an tuah nain phungning tein zeihmanh chim khawh mi a um rih lo, midang 200 tluk hriamnam chiah in a rak i fonh ding zong an um rih” tiah kahdohnak thawng latu hrampi a langhter.
A tutiang ah Myawaddy khuapi hrambunh Khah-Lah-Yah 275 battalion pawl hriamnam chiah ding in kap hnih karlak ceihhmainak an tuah tiah mizapi ralkap kahdohnak thawng latu cheukhat nih an langhter. Myawaddy khuapi chungah Myanmar phone line a tlau dih caah Thailand Sim Card hi minung tam deuh nih an hman tiah an chim. Lungmili Post
Thawngpang dang: Taze khuapi nitlaklei hmun ah khuasa mi tualchung mi 20 hna cu PDF pawl nan bawmh hna tiin SAC ralhrang nih April 5 ah an umnak sang ah luhhnawh in an tlaih hna, tiah an chim.
“Tlaih an ton in ni 2 a rauh hnu April 7 ah minung 4, April 9 ah minung 5 an dihlak minung 9 cu an thlah ṭhan hna, a voi 1nak i an thlah mi hna minung 4 lak ah thinlung lei damlonak a ngei mi 1 aa tel, nau a ngeihnak thla 4 lawng a si rih mi nu 1 zong aa tel i nizan ah minung 5 an thlah ṭhan hna, an hremnak hna ruang ah an hmai ah hma an tuar hna, Tung-bing khaltu 1 cu an hremnak ah a nunnak a liam i a ruak cu Tung-bing in an rak pek hna” tiah Taze tualchung mi pakhat nih RFA ah a chim.
A taang mi minung 10 hna cu Taze khuapi um palik sakhan ah an khumh hna i SAC ralhrang le an kuttang palik, pyusawhti pawl nih an hrem hna, tiah an thlah mi hna nih an chim. Atu hi an chungkhar hna nih pehtlaihnak an tuah kho hna lo i an dirhmun zong an thei kho rih hna lo, tiah tualchung mi hna nih an chim. Lungmili Post
Leave a Reply