ZRA Nih CNF/A An Ti Mi Hna Cu A Fak Ko

CNF/A hi phu dang doh ding policy in a kalmi an si tiah ZRA nih an chim. Chin National Front (CNF) hi a dang hriamtlai phu hna doh ding le a dang hriamtlai phu um ti lo ding timi policy in a kal mi a dir mi a si tiah ZRA Upa Pu Zo Thang nih CNI media ah a chim. Ramkhel lei hoih in hmaitonh bia i ruah ding timhcia tein kan um tiah a cunglei upa nih a chim.

“Kan nih cu kan i ready zungzal ko. Anmah CNF tu hi an ngah lo. Mipi zong nih zei ah an rel hna lo. CNF nih hin a dang hriamtlai phu hna zong biaruah ding in an i zuam bal lo. A dang hriamtlai phu hrawh dih i CNF lawng um an duh. Ramkhel lei cabuai cung in i rem an duh lo.

Phu dang doh ding policy lawng in an kal. Anmah nih kan ram ah ra in an kan doh ca ah ramkhel lei cun zeitik hmanh ah kan i rem kho lai lo,” tiah Pu Zo Thang nih a chim.

CNF/A le ZRA kar ah kahdohnak a chuak tawn i kaphnih in nunnak liam le hliamtuar zong an um pah len cang tiah theih a si.  ZRA hi Myanmar ramchung Tonzaang peng, Tedim peng, Sagaing ramthen, Tamu peng, Kalay-Kabaw chehvel le Myanmar – India ramri pawngkam ah hmun a khuar mi le a cawlcang mi an si. ChinTalk