Salen Khua Ah Inn I Duahpiaknak A Chuak. Thantlang Bualpeng Salen khua ah 2024 Vaupi 16 zinglei suimilaam 3 hrawng ah khuami inn 4 cu a ho ti hngallo mi nih an duahpiak hna, tiah thawng kan theih.
Khuami pakhat nih ” Zinglei suimilaam 3 hrawng ah Saya Bawi Tha Bik, Pu Tha Bik, Pu Tial Ceu Uk, Pu Hrang Lian Thang inn hna cu a ho ti fianghlang in hngalhlo mi nih an duah piak hna. Inntang in duahhram an thawk i, inn ngeitu nih thawng an theih i, an hmih manh. Inn kaangh taktak nak cu a chuak lo. Inn pakhat cu an facang chiahnak tiang an duah piak hna i, vanthat ah a tlaih manh hlaan ah an hmih manh, tiah a chim.
Ralzaam inn hna zong thla tampi chung zaanchiar lung le thing in an chehpiak hna, a sinain a minung taktak a ho set a si fianghlang in hngalhfian an si rih lo, tiah a chim chap.
Salen khua ah bu pakhat anmah chung lila i hmuhthiam lo nak a chuah caah kaphnih in an um i, innlam i fanhnak le biakinn kong tiang ah i hmuhthiam lo nak a um i, pengtlang i thithruainak le Khrihfabu lei zong nih an remh kho rih hna lo, tiah kan theih. The Lairam Times –
Thawngpang dang: Iran lei in kahdohnak hi Israel nih lehrulnak kan tuah lai || IDF chief of staff. Israel ralkap bawi zik nih, “Israel a bawmtu hna ram sin ah lunglawmnak bia a chim pah in, Israel nih Iran hi lehrulnak kan tuah lai,” tiah video tawite in a chim.
IDF chief Herzi Halevi nih, “Israel nih Iran hi a herh kan ti ning in lehrulnak kan tuah lai,” tiah a chim lio ah “Iran drones le missiles pawl vulei tlakter manh lo in a rak kahpitu US, UK, French le a dang ram pawl sin ah” lunglawmnak bia a chim.
Nai zarhpi zing kate (April 14) ah khan Iran nih Israel cu drones le missiles 300 reng lo in a rak kah hna nain, Iran lei in kahnak 99 percent cu hlawhtling tein kan kham khawh tiah Israel nih a chim.
Hiti Iran nih Israel a kahnak khamnak hi “Operation Iron Shield” tiah min an sak. (Laknak: The Independent) ChinTalk
Leave a Reply