Breaking News :Hakha Khuathar Sang Chung Dawr Vialte Khar Ding Le Biakinn Ah Minung 5 Cung I Pumh Lo Ding In SAC Nih Nawl Chuah

Hakha Khuathar Sang Chung Dawr Vialte Khar Ding Le Biakinn Ah Minung 5 Cung I Pumh Lo Ding In SAC Nih Nawl Chuah.Chinram, Hakha khuathar sang chung i dawr vialte khar dih ding le Biakinn ah minung 5 nak tam i pumh lo ding in nihin April 22 ah SAC nih nawl an chuah.

A luancia April 12 ni ah khuathar lamton ah SAC Minister pawl an i cit mi motor kah a ton hnu in atu bantukin khuathar sang chung mi hna ca ah SAC nih nawl a chuahnak a si kong zong an thanh chih.

CDF nih mizapi inn le Biakinn pawl ah hmunhma la in SAC VIP motor an kah caah upa cheukhat tel in hliamhma a pu mi an um, tiah nawl an chuahnak cathanh ah SAC nih a langhter. A cunglei kong he pehtlai in SAC nawl chuah mi a zul lo mi cu phungning in dantat an si lai i, nawl chuah ni nihin April 22 thawk in a ralai mi June 20 tiang a karlak ah nawl chuah mi dang a um lo ahcun fehter a si cang, tiah SAC nih cathanh ah an langhter.

Thawngpang Dang Rakrel Chih :Kawkareik Khuapi Ah SAC Ralkap Nih Sivai A Ngei Mi Bomb An Thlak.Karen ramkulh, Kawkareik khuapi chung ah ralkap thazaang tampi he rallam a sial mi SAC ralkap nih Drone in sivai a ngei mi bomb an thlak i tualchung hriamtlai phu in ralkap cheukhat cu sivai an ri hna. An luak a chuak i khuapi chuahtak chung in hmun dang ah an i ṭhial kong White Tiger Column in ṭuanvo ngei pakhat nih a chim.

April 20 ni thawk in Kawkareik khuapi hrambunh Khah-Lah-Yah 97 in SAC ralkap tam ngai cu Kawkareik khuapi chaklei ah Drone in sivai ngei mi bomb thlak in rallam an sial pin ah Honwitzer, vanlawng le hriamngan dang he rallam an sial caah tualchung hriamtlai phu pawl cu khuapi chuahtak chung in hmun dang ah an i ṭhial chung, tiah theih a si.

SAC ralkap nih Drone in sivai a ngei mi bomb an thlak mi khu aa dawp sual mi cu an luak a chuak i lungfim lo in an um, an thaw a pit i zeihmanh an tuah kho ti lo. Cu pin ah, vanlawng, Honwitzer le hriamngan dang in bomb an thlak caah khuapi chuahtak in hmun dang ah an i ṭhial chung kong tualchung hriamtlai phu nih an chim.

A luancia April 11 ni thawk in Myawaddy khuapi ah kahdoh bawm ding in vanlawng le tanglei he a kal mi SAC ralkap pawl cu Kawkareik khuapi pawng ah KNLA ṭangṭi phu nih an kah hna i SAC ralkap nih hriamngan le vanlawng in Kawkareik khuapi pawng khua hna ah kahdohnak an tuah ruang ah tualchung mi pawl cu a himnak hmun kawl in an zaam hna, tiah theih a si. Credit : The Chin Post