Khampat le Sawbua Khua SAC Ralkap Nih Vanlawng In Bom A Thlak. Sagaing ramṭhen, Khampat khua le Sawbua Ye-shin khua cu SAC nih Jet vanlawng in bom a thlak i mipi a thi mi le hliam a tuar mi an um tiah Zalen nih a langhter.
April 22 zinglei sml 2:00am hrawng ah Khampat khua No. 1 sang cu Jet vanlawng in voi 3 tiang bom a thlak i mipi 3 an thi, 10 nak tlawm lo an i hliam, Sawbua Ye-shin khua zong bom voi 2 a thlak i mipi 1 a thi, 4 nak tlawm lo an i hliam tiah a langhter.
“Khampat le Sawbua khua ah kahdoh a chuah lo nak hi a sau cang. Khampat ah bom nih a khen i a ruak aa varh dih mi a um. Hliam a tuar mi zong an tam” tiah Khampat khuami nih Zalen ah a chim.Sawbua Ye-shin khua hi Kalay-Tamu lam ah a um mi khua pakhat a si i Sawbua khua zong ah mipi aa hliam mi an um bantuk in mipi inn zong a rawk tiah khuami hna nih an chim. Khampat khua hi a luancia 2023 November 8 ah dothlennak phu pawl nih an lak mi khua a si.
Rak Rel Chih HrimHrim :Hakha Khuathar Sang Ah Dawr An Khar Ter Hna I Biakinn Ah Minung 5 Leng I But Lo Ding Tiah Cathanh An Chuah. Chin ramkulh, Hakha khua ah SAC nih riankhinh mi Minister pawl nih an i cit mi mawṭaw kahdoh an ton caah thil a cannak pawnghrawng ah a um mi mipi pawl dantatnak ah SAC nih April 22 thawk in cathanh pakhat a chuah.
SAC nih riankhinh mi Minister pawl nih an i cit mi mawṭaw kah an tonnak Khuathar sang chung dawr zapi awn lo ding, biakinn chung ah minung 5 leng i but lo ding tiah cathanh (nawl) an chuah i hi cathanh hi June 20 tiang zei cathanh hmanh chuah ṭhan a si lo ahcun fehter peng a si tiah SAC nih an thanh.
CDF pawl nih khuathar sang chung biakinn le mipi inn pawl kha khamnak hmang in SAC kuttang Minister pawl mawṭaw an kah i mawṭaw aa cit mi upa cheukhat an i hliam tiah an rak thanh ve.
A luancia April 12 ah SAC nih riankhinh mi Minister pawl mawṭaw cu Hakha khuathar lamton ah CDF-Hakha nih an kah hna i mawṭaw aa cit mi Minister 3 telh in minung 6 an i hliam tiah CDF-Hakha nih a thanh.
Thawngpang Dang :Kawkareik Ah SAC Nih Chemical Bom A Hman.Karen ram, Kawkareik khuachung ah thazang tampi in a rak lut mi SAC ralkap pawl nih Drone in Chemical bom an thlak caah dothlennak phu lei hriamtlai pawl an rii i cheukhat nih an luak caah khuachung in an zaam chung tiah White Tiger phu nih thawng an thanh.
April 20 thawk in Kawkareik khua hrambunh SAC ralkap LIN 97 in SAC ralkap tampi cu Kawkareik khua chaklei ah drone in Chemical bom pawl an thlak, thazang tampi in an lut, a phirphir in kah mi bom an hman, Howitzer bom pawl, vanlawng pawl hmang in vawlei lei le vanlei he kahdohnak fak taktak an tuah caah dothlennak phu pawl nih khua in aa hlatnak hmunhma cheukhat ah an zaam tiah theih a si.
“Drone in a seik (poison) a um mi bom an thlak, cu bom khu cu dothlennak phu pawl nih an i dawp caah an rii i an luak, zeihmanh an tuah kho ti lo, cun SAC ralkap lei nih bom a phirphir, Howitzer bom pawl, kahdohnak vanlawng pawl in bom a thlak, kahdohnak dirhmun/hmunhma pawl chikhat kan zaam tak” tiah dothlennak phu lei nih Khit Thit ah an chim.
April 11 thawk in Myawaddy khua ah bawmhnak pek ding in a kai mi kekal ralkap pawl cu Kawkareik pawnghrawng ah dothlennak phu pawl nih an kham hna caah kaphnih karlak kahdohnak a fak tiah an langhter.Credit : The Chinland Post
Leave a Reply