Malaysia ram, Kuala Lumpur ah Chin tlangval pakhat cu naam in sawh a ton caah a nunnak a liam, tiah theih a si.
Naam in sawh a tong mi pa hi kum 30 hrawng a si i Mindat lei mi a si. Nizaan April 22 zaan ah khan i velhnak a chuak i naam in sawh a ton hi a si, tiah a hawile nih an chim.
Naam in a sawhtu pa hi Sagaing ramṭhen in Malaysia ah a phan ka mi a si i, a zaam caah palek nih an tlai kho rih lo, tiah theih a si.thawngpang dang rel chap rih >>>>>>>
Chinland cozah nih Chinram chung khualtlawnnak cu April 13-19 tiang a ngei, tiah theih a si.
Cu khualtlawnnak ah cun Chinram Chief Minsiter Pu Pa Thang nih a hruai hna i, Zotung, Zophei, Lautu le Senthang hmunram hna i ukhruainak lei ṭuanvo ngeitu hna le mizapi he ton biaruahnak an ngei.
Mizapi he ton biaruahnak ah cun Chinram cozah ukhruainak kong chimfiannak, Chinram cozah le peng/tlang ukhruaitu bu hna hmunkhat ah rianṭuan ṭi khawh a si nakhnga peng/tlang hna nih mahle ukhruainak phung serchuah a herhnak kong pawl ceihhmainak zong an ngei.
Chinram cozah cu Chinram le Chin miphun hlawknak cuan in ukhruainak lei rian a ṭuantu ding a si caah Chin mipi zong nih Chinram cozah rianṭuannak ah dirkamh a herh, tiah Chief Minister Pu Pa Thang nih a chim.thawngdang dang >>>>>>>
Hakha peng (Zokhua peng, Mie peng le Hakha khuachung) thingkung hau, tihthing laak le meiholh rawh kong he pehtlai in Vawlei le Thingram lei zung i ṭuanvo ngeitu hna sin ah sok hmasa a si lai, tiah CDF-Hakha Central Council nih nihin April 22 ah theihternak a tuah.
Pumpak hman awk, biaknak lei hman awk le mizapi hman awk ah thing hau, tihthing laak le meiholh rawh a duh mi hna nih ahlanken ni 5 in ṭuanvo ngeitu hna sin ah sok a hau, tiah an langhter.
Cun, Hakha peng chung in hmun dang/peng dang ah thing le meiholh phorh duh ahcun Vawlei le Thingram lei zung i ṭuanvo ngeitu hna sin ah ahlanken ni 4 in sok hmasa ding, tiah an langhter chap.
Nawl onhnak catlap ngei lo le phungning lo in a cunglei rian a ṭuan mi hna cu upadi ning in dantat nan si lai, tiah theihternak an tuah.>>>>>>>>>
Nihin April 22 zinglei ah Khampat khua le Sawbua-Yesin khua cu SAC nih vanlawng in bomb a thlak caah nu pahnih le pa pakhat an nunnak a liam, tiah thawng kan theih.
Nihin zinglei sml. 2:00 hrawng ah khan Chinmi tampi an umnak Khampat khua le Sawbua-Yesin khua cu SAC nih Fighter Jet in bomb a thlak i, Khampat khua ah kum 17 a si mi nungak no pakhat le kum 20 a si mi tlangval pakhat an nunnak a liam pin ah a dang pathum hliamhma an pu.
Sawbua-Yesin khua zong ah kum 46 a si mi nu pakhat a nunnak a liam i minung 7 nih hliamhma an pu.
Khampat khuachung ah hin Pound 500 bomb tel in a tlawm bik bomb pathum hi SAC nih a tlak caah inn pasarih zong an rawk.
Cun, Sawbua-Yesin khua ah bomb voi 2 a thlak i, pastor inn pakhat tel in khuachung inn panga an rawk.
Kan hnu January thlathawh lei zong ah khan Khampat khua pawng i Kanan khua cu SAC nih vanlawng in bomb a rak thlak caah tualchungmi 17 an nunnak a rak liam, tiah theih a si.News & Photo – Khonumthung>>>>>>>>>>>>>>>
Karen ramkulh, Myawaddy lei ah bawmh ding in a kal mi SAC ralkap Tank (Armoured vehicle) le Machine Gun an tarh mi motor pawl cu Daw-Nah tlang hram ah Karen hriamtlai KNLA le PDF nih nizaan April 21 ah an hrawhpiak khawh hna, tiah theih a si.
Thailand-Myanmar ramri Myawaddy khua i a donghnak bik SAC ralkap sakhaan (Kha La Ya 275) cu Karen hriamtlai nih an rak laak i Kha La Ya 275 ah a um mi SAC ralkap pawl cu Thailand-Myanmar ramri hlei pawng ah an zaam hna.
Nizaan ah an hrawh mi SAC tank le motor pawl hi ramri hlei ah a um mi SAC ralkap pawl bawmh ding in a kal mi an si, tiah an chim.
Bawmh ding in a kal mi SAC ralkap pawl cu Daw-Nah tlang hram ah KNLA le PDF nih an kah hna i SAC raldohnak tank pakhat le Machin Gun an tarh chih mi motor paruk an hrawhpiak khawh hna, tiah theih a si.
Leave a Reply