Vaupi 24 | 2024
Sagaing ramṭhen, Kalaymyo peng Kalay sianghleirun ah umhmun khuar mi SAC ralhrang pawl cu tualchung hriamtlai ṭangṭi phu hna nih 2024, April 22 ah Fixed Wing Drone in Air bomb 4 an thlak hnawh hna, tiah theih a si.
April 21 zong ah Kalaymyo cheklei hmun um SAC ralhrang Gate cu Shar Htoo Waw Drone thiamnak in bomb 5 kan thlak hnawh hna, tiah Kalay pengkomh mizapi ralkap Drone phu (Wings of Kalay Drone Team) nih an thanh.
Tualchung mi pakhat zong nih “Cu kahdohnak ahcun SAC ralhrang lei in 2 an thi i hliam a pu mi 5 an si, Kalay sianghleirun kulh chung in puahkehnak thawng kan theih, Cun Kalaymyo kan dirhmun hi kahdohnak a faak deuh kho mi a si, Kalaymyo chaklei hmunram ahcun pehtlai in kahdohnak a um” tiah a chim ve.
Kahdoh a tong mi Kalay sianghleirun ah umhmun khuar mi ralhrang pawl nih aa chawk mi tualchung mi hna cu minung pakhat ah tangka 10,000 cio an khawlh tawn hna, tiah theih a si.
Moebe Kahdohnak ah Mizapi Ralkap 25 an Nunnak a Liam Cang. April 23 || Shan le Karenni ramri Moebe khua i SAC ralkap sakhaan laak kahdohnak ah mizapi ralkap bu fonh lei in minung 25 an nunnak a liam, tiah theih a si. Moebe SAC ralkap sakhaan (422) cu mizapi ralkap hna nih zarh hnih chung an tuk cang i, mizapi ralkap lei in a nunnak a liam mi an tam pin ah
a ke a bul mi ralkap 15 hrawng zong an um, tiah mizapi ralkap ṭuanvo ngeitu pakhat nih a chim. “Sakhaan chung ah SAC ralkap tam an taang ti lo nain ralkhamnak ṭha tuk in an i ser caah vun luh hnawh taktak ding ah a har ngaingai. Kan ralkap hliam tuar le a thi mi an tam nain dinh lo in kan nor thluahmah ko,” tiah a chim. Hi sakhaan dohnak ah hin mizapi ralkap lei in a ke a bul mi ralkap pali zong an i tel i pehzul in ral an do cuahmah ve, tiah theih a si.
Vice Senior General Soe Win Mizapi Sin In A Tlaunak Ni 20 A Si Cang 23 April 2024 Hramhram in nawlngeihnak a latu SAC ralkap chung ah Vice Chairman a ṭuan mi Senior General Soe Win cu mizapi sin ah aa langh ti lonak nihin April 23 in ni 20 a si cang. Voi dang tawn bantukin thla fatin tuah tawn mi SAC tonbiaruahnak cu SAC Chairman le Vice Chairman hruainak in tuah a si tawn nain nizan April 22 zinglei ah tuah mi SAC tonbiaruahnak ah cun Vice Senior General Soe Win aa tel ti lo. Nizan April 22 zinglei ah
tuah mi SAC tonbiaruahnak ah cun Senoir General Min Aung Hlaing lawng nih a hruai hna i cinthlaknak, kokek puicimh, fimcawnnak le zaanglek kong ceihmainak an ngeih kong SAC Information nih an thanh. April 8-9 ah Mon ramkulh, Mawlamyine khuapi hrambunh nithlak thlanglei Division Headquaters(Yah-Tah-Khah) cu Drone in an rak kahdoh hnu in Vice Senior General Soe Win cu nihin tiang mizapi sin ah aa langh ti lo. Cu kahdohnak cu Alpha Bats Drone Force nih an kalpi mi a si i Vice Senior General Soe Win telh in Division Headquaters in ralbawi cheukhat hliam an tuar kong April 9 ni ah Alpha Bats Drone Force nih an thanh. Ramkhel lei a thiam ngai mi
U Thein Soe Naing nih cun, “Drone kahdohnak ah hliam a pu i cucaaah Soe Win cu mizapi sin ah a langh ti lonak a si,” tiah RFA a chim. SAC chimnak nawlngei Major General Zaw Min Tun nih cun, “Vice Senior General Soe Win cu voi dang kel in a rian a ṭuan ko,” tiah a luancia zarh chung ah Media sin ah a chim ve. Vice Senior General Soe Win kong he pehtlai in a luancia April 3 ni ah tuah mi Bahtoo khuapi i ralkap training an dih lawmhnak a kal cu SAC Information nih a donghnak bik an langhter a si.
SAC Ralkap Nih Zarh Hnih Chung Ah Kalay Peng Khua 5 Ah Inn 700 Leng An Khangh || 23 April 2024 Sagaing ramṭhen, Kalay peng chaklei khua 5 cu April zarh hnihnak thawk in SAC ralkap nih rallam sial in an khangh i zarh hnih chung ah inn 700 leng a kaang, tiah cuka khua a um mi nih an chim. A luancia April 8 ni in nihin April 23 tiang ah Pyinkhongyi khua inn 450 leng, Pyinkhonlay khua inn 200 hrawng, Hantharwaddy khua inn 13, Kanthar khua inn 31 le Yaukchokwin inn 50 hrawng cu SAC ralkap nihan khangh, tiah an chim. “Nizan April 22 ni zong ah Kalay peng le Tedim peng ramri ah a um mi Mainuai khua cu SAC ralkap nih an khangh, Kalaymyo peng chaklei khua hna ah rallam sial in inn a khangtu SAC ralkap pawl cu nihin tiang Pyinkhongyi khua ah umhmun an khuar ko,” tiah tualchung pakhat nih a chim. Inn a kaang mi cazin a khawmtu Data For Myanmar nih April 15 tiang i cazin an khawmh mi ah SAC ralkap nih hramhram in nawlngeihnak an laak kum thum leng chung ah Myanmar ram hmun kip ah SAC ralkap nih inn 80,000 leng an khangh cang.
Leave a Reply