SAC Sakhan Laak Kahdohnak Ah Ralhrang 15 An Thi, 5 An Tlaih Hna

Myingyan Peng Kyi Khua SAC Sakhan Laak Kahdohnak Ah Ralhrang 15 An Thi, 5 An Tlaih Hna. Mandalay ramṭhen, Myingyan peng, Ayeyarwady tiva lei ah SAC ralhrang le pyusawhti pawl nih umhmun an khuarnak Kyi khua sakhan cu tualchung hriamtlai ṭangṭi phu hna nih luhhnawh in an kahdoh i an laak khawh, tiah Myingyan pengkomh Battalion No.2 (MGN-Tiger) nih nihin April 24 ah an thanh.

2024, April 20 ah kan kahdoh hi a si i sakhan laak kahdohnak ah SAC ralhrang lei in 15 an thi i 5 kan tlaih hna pin ah 60MM zuun 1, 60MM bomb kuan 9, MA3 meithal zuun 2, kuanfang pawl le hriamthil dang zong kan laak chih khawh, tiah an langhter.

Kahdohnak cu suimilam 3 chung tluk a rau i kan laak khawh hnu sakhan thianhlimnak le zohfelnak kan tuah lio ah SAC ralhrang nih tilawng in ral bawmtu an rak thlah hna caah mizapi ralkap nih hnulei kan tolhtak hna.

Kahdohnak caan chung ah dothlennak hriamtlai ṭangṭi phu in Ralkap Akar Min nih ram le miphun caah a nunnak a pek i minung 4 nih hliam faaktuk lo an tuar, Myingyan pengkomh Battalion No.2 (MGN-Tiger) nih an thanh mi ah langhter chih.Crd: Lungmili Post

Thawngpang dang: Chin hriamtlai phu unau nih a kalpi mi Operation nih aa tinh mi bantukin Kyindwe khuapi kahdohnak ah SAC ralkap nih zeitluk hmanh in thazaang chap in vanlawng in kahdohnak tuah hmanh seh law hnu kan tolh hrimhrim lai lo, tiah Chin hriamtlai phu unau nih an thanh.

Chin hriamtlai phu unau nih Kyindwe khuapi kan laak hlan lo fak deuh in kahdohnak an kalpi lai i khuapi laaknak ding ca ah a lam kip in a kan bawmtu AA cung ah a hlei in lawmh bia kan chim, tiah Chin hriamtlai phu unau nih cun an thanh.

Kyindwe khuapi cu a liamcia 2023 December 22 ni in Chin hriamtlai phu unau nih kah hram an rak thawk i a luancia April 20 ni tiang kahdohnak an kalpi ko nain SAC ralkap nih ralkap thazaang chap in vanlawng in kahdohnak an tuah ruang ah Kyindwe khuapi an laak khawh rih lo kong Chin hriamtlai phu unau nih mizapi sin ah theihternak an tuah.

Chin hriamtlai phu unau ti mi cu Zomi Federal Union(ZFU), Chin National Organization(CNO), Chin National Council(Mindat), Maraland Territorial Council(MTC), Chin Defense Force – Kanpetlet(CDF-Kanpetlet) le Chinland Defense Force-Matupi(Brigade 1) i fonh in dirh mi phu a si. The Chin Post