Vomthu Siizung Bomb Thlak Hnawh Mi Kong Ah Chinland Cozah Le CNF/A Nih Cathanh An Chuah. Chin ramkulh, Mindat peng, Vomthu khua siizung cu SAC ralhrang nih cunglei in bomb a thlak mi kong ah Chinland cozah le Chin miphun ralkap CNF/A nih faak pi in kan doh i kan minung hawi tualchung mi hna cu bawmhnak kan pek hna lai, tiah April 27 ah an thanh.
Sualnak ngei lo tualchung mi hna an i thlopbulnak Vomthu khua siizung cu minung lungput zong a ngei lo mi SAC ralhrang nih bomb a thlak hnawh mi kong ah ram innpa hna nih dantatnak pek ding le Vomthu khua siizung sak ṭhan khawh nakding ca ah bawmhchanh ding in Chin miphun ralkap CNF/A nih nawlnak an tuah.
SAC ralhrang nih tinhchih tein bomb a thlak mi cung ah Chinland cozah zong nih faak piin a dohnak kong le kan minung hawi an si ti mi lungput ngei in bawmhnak pek a timh nakkong a langhter ve.
A luancia 2024, April 25, zan suimilam 8:00 tluk ah Vomthu khua siizung cu SAC ralhrang nih raltuknak vanlawng in bomb a thlak i mizaw le siizung rianṭuantu minung 5 an thi pinah minung 30 tluk nih hliam an tuar, tiah theih a si. Lungmili Post
Thawngpang dang: Pawngkam Mi Nih An Report Hna Ruang Ah Myanmar Ram Mi 20 Leng Cu Thailand Ah Tlaih An Tong. Thailand ram, Chonburi pengkomh, Pattaya khuapi chung innkhan 2 ah khuasa mi hna cu report an ton caah Thailand ram Lah-Wah-Kah le palik nih luhhnawh in an kawl hna i phungnung lo in a lut mi Myanmar ram mi 21 cu tlaih an si, tiah Thailand ram thawng zamhnak Pattaya Mail nih a langhter.
Myanmar ram mi 21 nih an hlan mi innkhan 2 ah pa 19 le nu 2 an um i pawngkam mi nih report an tuah ruang ah atu bantuk in an tlaih hna hi a si. Tlaih a tong mi hna cu an chekhlat hna i ramdang kalnak (Passport) le Thailand ram luhnak nawl (visa) a ngei lo mi an i tel i Updadi ning in dantat an si lai, tiah a langhter. Atu bantuk in tlaih a tong mi hna cu zan ah hna an chet i dawhcah lo in an um lengmang ruang ah pawngkam mi hnahnawhnak an kan pek tiin an report hna hi a si, tiah Pattaya Mail nihcun a langhter chih. Lungmilipost
Leave a Reply