Falam Pengkomh Palik Zung In Palik Lieutenant Nu 1 Cu Mizapi Sin Ah Aa Fonh. Chin ramkulh, Falam pengkomh palik zung ah rianṭuan mi palik Lieutenant nu 1 nih Yaw hmunram hriamtlai phu (YDF) cu pehtlaihnak a tuah hna i mizapi sin ah aa fonh, tiah YDF nih nihin 2024, April 11 ah an thanh.
Palik Lieutenant nu 1 cu CNDF le Chin miphun ralkap CNA hna nih an bawmhchanhnak thawng in a chuak kho i anmah hriamtlai phu sin ah an kalpi khawh, tiah an langhter.
Yaw hmunram hriamtlai phu (YDF) sin ah pehtlaihnak tuah in mizapi sin ah aa fonh mi palik chungtel 3, hriamnam tlai a si lo mi cozah rianṭuan 1 le pyusawhti khua chuahtak in a zaam mi minung 100 tluk a si cang, tiah YDF nih an langhter chih. Lungmili Post
Thawngpang dang: SAC Ralkap Nih Tlangzawl Khua Mi Cu Thil An Phurhter Hna I Pakhat An Thah. Sagaing ramṭhen, Kalay peng, Tahan–Letpanchaung lampi chung ah a um mi Tlangzawl khua mi cu SAC ralkap nih thil an phurhter hna i, thil a phur ve mi Pu Tluang Tin Zam(kum 44) cu SAC ralkap nih a ṭaang ah meithal in voi 4 an kah i a nunnak a liam, tiah theih a si.
A luancia April 5 ni ah Vaphai khua ah a um mi tualchung hriamtlai phu kap ding in SAC ralkap pawl cu rallam an sial i lampi ah an hmuh mi tualchung mi paoh an tlaih hna i Tlangzawl khua inn hnih ah an hren hna. Cu ni chunhnu suimilam 2:00 hrawng ah Tahan lei ah an thlah ṭhan hna nain Tlangzawl khua mi pa 5 tu cu thil phur ding ah an kalpi hna i, lung zawtnak a ngei mi Pu Tluang Tin Zam cu a ṭih tuk i zaam aa timh caah SAC ralkap pakhat nih an kah i a hmun ah a nunnak a liam colh, a dang minung 4 tu cu an thlah ṭhan hna, tiah theih a si.
April 6 ni ah thah a tong mi Pu Tluang Tin Zam ruak cu khua mi nih an kawl i an hmuh nain Vaphai khua ah umhmun a khuar mi SAC ralkap pawl nih an kah hna caah a ruak cu a rannak in Duwinchaung thlanmual ah an phum colh, tiah theih a si. The Chin Post
Leave a Reply