Malaysia Ah Lainawngtu Pa An Tlaih Cang. East Lairam Hakha, Zokhua peng Malsawm khuami Malaysia ah khuasa Pi Tha Tin Hnem fapa, Salai Peter Biak Tha Cung cu Malaysia ah 2024 Vuapi 14 ah mikut in a nunnak a liam.
Lainawngtu hi East Lairam, Hakha, Mie peng Hmaikhah khuami Malaysia ah Khuasa Hrang Tling Thang a si i, lainawnnak a tuah hnuah a zaam.
Salai Peter Biak Tha Cung thattu Hrang Tling Thang cu, a zaamnak in a hawipa inn ah a chuak i a hawipa nih a report hnuah zaan suimilaam 11:27 hrawng ah an tlaih, tiah thawng kan theih. The Lairam Times
Thawngpang dang: Mizoram ramkulh, Siaha khuapi in Chinram, Thantlang peng, Vuangtu khua lei ah khualtlawng mi 17 nih an i cit mi Pickup motor cu Lungbun le Tipi karlak an phak 2024, April 13 zanlei sang ah Accident a tong, tiah theih a si.
“Siaha khuapi in kan rak chuak i ramri um tiva kan phak hlan Lungban le tiva karlak kan phak zanlei suimilam 5:30 tluk ah atu bantuk in kan motor aa lehsual hi a si, motor Brake a ṭhat lo ruang ah a si i Pu Mang Cung (kum 50) hrawng cu hmakhat te ah a nunnak liam” tiah motor aa cit ve mi Vuangtu khua mi pakhat nih a chim.
Motor aa cit mi dihlak hi minung 17 kan si, mah lak ah kum 1 leng ngakchia 1 le kum khat hmanh a tling rih lo mi ngakchia 1 zong an i tel i minung 9 nih hliam an tuar. Hliam a tuar mi hna cu Siaha khuapi sii-inn ah an kalpi hna i hliamhma faak deuh mi 3 hna cu Aizawl khuapi sii-innpi ah an lanhpi hna, tiah a chim chap.
Motor Accident nakin nunnak liam mi Pu Mang Cung hi hlaphuah le hlasak lei zong ah bochan ngai mi a si i April 14 ah a ruak cu a chuahnak Vuangtu khua ah an vui, tiah theih a si. Lungmili Post
Leave a Reply