SAC nih Myitkyina thonginn ah kum 6 thong thlak ding in bia an rak ceihpiak mi Kachin Baptist Convention Chairman hlun Rev. Dr. Hkalam Samson cu nizan April 17 thongtla luatnak a hmu mi lak ah aa tel ve nain SAC ralkap nih a umnak inn ah an tlaih ṭhan, tiah KBC in ṭuanvo ngei nih an chim.
Rev. Dr. Hkalam Samson cu thawngṭha a chim mi ruang ah a liamcia 2022 December 4 ah Mandalay Airport ah SAC ralkap nih an rak tlaih i, kum 6 tiang thong thlak ding in bia an ceihpiak nain kum khat le cheu hrawng thong a tlak hnu ah nizan April 17, chunhnu suimilam 1:00 hrawng ah luatnak a hmu nain zan suimilam 10:00 hrawng ah SAC ralkap nih a umnak inn ah an va tlaih ṭhan kong KBC in ṭuanvo ngei pakhat nih cun a chim.
“Zeiruang ah dah Dr. Hkalam Samson hi an tlaih ṭhan hnga ti kan hngal ve lo, zahan zan suimilam 10:00 hrawng ah khan an tlaih i Rev. Dr. Hkalam Samson nupi le Peace-talk Creation Group(PCG) chungtel pakhat zong an tlaih chih hna,” tiah KBC in ṭuanvo ngei pakhat nih a chim.
Tlaih a tong mi Rev. Dr. Hkalam Samson telh in a nupi le Peace-talk Creation Group(PCG) chungtel pakhat cu Myitkyina thonginn ah an hren hna, tiah Rev. Dr. Hkalam Samson he naihniam in a um tawn mi nih an chim.
Nizan April 17 ah SAC nih thongtla 3,303 an thlah hna i, cu chung ah cun ramdang mi 98 zong an i tel, ramkhel thongtla belte minung 91 lawng an i tel, taih theih a si.
SAC Nih Luatnak An Pek Mi Hna Lak Ah Ramkhel Thongtla 91 Lawng An I Tel>>>>>>>>>>>>>
SAC nih luatnak an pek hna lak ah ramkhel thongtla 91 lawng an i tel, tiah Political Prisoners Network Myanmar(PPNM) nih an chim.
Nizan April 17 ah SAC nih Myanmar ram hmun kip ah a um mi thonginn le palik sakhan ah thong an thlak mi 3,303 cu luatnak an pek hna i an thlah ṭhan cang hna, cu chung ah cun ramkhel thongtla 91 lawng an i tel.
“SAC nih luatnak a pek mi hna lak ah kum saupi thongtla ding in bia an ceihpi hna an i tel lo i, ramkhel thongtla luatnak a hmu mi an tlawm tuk, PPNM nih cazin kan khawmh mi ah thonginn 15 in ramkhel thongtla a luat mi 91 lawng an si,” tiah Political Prisoners Network Myanmar(PPNM) in ṭuanvo ngei Ko Theik Htun Oo nih a chim.
“SAC nih thongtla an luatter mi hna chung in chuah nicaan a phan deng mi minung zong an i tel,” tiah NLD Party Central Committee chungtel U Kyaw Htwe nih a chim. Luatnak hmu kho rih lo in thonginn ah a taang rih mi NLD chungtel 1,269 an um i, cu chung ah cun Parliament palai 65 an i tel.
Ramkhel thongtla zohkhentu phu(AAPP) nih a luancia April 12 ni tiang an langhter ning ah SAC ralkap nih hramhram in nawlngeihnak an laak hnu in tlaih a tong mi 26,524 an si i, minung 8,940 cu thong thlak ding in biaceihpiak mi an si.
Leave a Reply