Poi Ko Ee :Kachin Baptist Convention Chairman Hlun Rev. Dr. Hkalam Samson Cu SAC Nih An Tlaih Ṭhan

Kachin Baptist Convention Chairman Hlun Rev. Dr. Hkalam Samson Cu SAC Nih An Tlaih Ṭhan.SAC nih Myitkyina thonginn ah kum 6 thong thlak ding in bia an rak ceihpiak mi Kachin Baptist Convention Chairman hlun Rev. Dr. Hkalam Samson cu nizan April 17 thongtla luatnak a hmu mi lak ah aa tel ve nain SAC ralkap nih a umnak inn ah an tlaih ṭhan, tiah KBC in ṭuanvo ngei nih an chim.

Rev. Dr. Hkalam Samson cu thawngṭha a chim mi ruang ah a liamcia 2022 December 4 ah Mandalay Airport ah SAC ralkap nih an rak tlaih i, kum 6 tiang thong thlak ding in bia an ceihpiak nain kum khat le cheu hrawng thong a tlak hnu ah nizan April 17, chunhnu suimilam 1:00 hrawng ah luatnak a hmu nain zan suimilam 10:00 hrawng ah SAC ralkap nih a umnak inn ah an va tlaih ṭhan kong KBC in ṭuanvo ngei pakhat nih cun a chim.

“Zeiruang ah dah Dr. Hkalam Samson hi an tlaih ṭhan hnga ti kan hngal ve lo, zahan zan suimilam 10:00 hrawng ah khan an tlaih i Rev. Dr. Hkalam Samson nupi le Peace-talk Creation Group(PCG) chungtel pakhat zong an tlaih chih hna,” tiah KBC in ṭuanvo ngei pakhat nih a chim.

Tlaih a tong mi Rev. Dr. Hkalam Samson telh in a nupi le Peace-talk Creation Group(PCG) chungtel pakhat cu Myitkyina thonginn ah an hren hna, tiah Rev. Dr. Hkalam Samson he naihniam in a um tawn mi nih an chim.Nizan April 17 ah SAC nih thongtla 3,303 an thlah hna i, cu chung ah cun ramdang mi 98 zong an i tel, ramkhel thongtla belte minung 91 lawng an i tel, taih theih a si.

Good News :Natmauk Peng Ah Hriamnam Aa Tlaih Mi SAC Khuabawi Pakhat An Fimhlawm.Magway ramṭhen, Natmauk peng ah hriamnam aa tlaih mi SAC kuttang rianṭuan Na-Hphonkone khuabawi Khin Maung Aye cu an fimhlawm i Carbine meithal le Pistol telh in ralkap hman mi thilri an laak kong People’s Defence Organization – Natmauk nih an chim.

Nizan April 17, zanlei suimilam 4:10 ah Na-Hphonkone khua khuabawi le Pyusawhti hruaitu zong a si mi Khin Maung Aye cu a umnak inn pawng ah tualchung hriamtlai ṭangṭi phu nih meithal in an kah i hmunril ah a thi, tiah theih a si.

Tualchung hriamtlai ṭangṭi phu pawl cu Pyusawhti hruaitu Khin Maung Aye nih a inn pawng an phanh ah aa tlaih mi Carbine meithal in a rak kah hmasa hna hnu ah kaphnih kar kahdohnak minute 5 chung hrawng a chuak i cu hnu ah Khin Maung Aye cu an fimhlawm khawh. Tualchung hriamtlai phu lei in thi le hliam an um lo, tiah theih a si.Credit : The Chin Post