Mandalay ramṭhen, Myingyan peng chung um SAC ralkap pawl nih hmunhma an khuarnak sakhaan pawl cu Sin-min Operation min in an kah hna i 60 MM telh in hriam le kuanzen pawl an lak khawh, SAC ralkap 20 hrawng an thi tiah Myingyan pengkomh PDF Battalion 2 (MGN Tiger) nih a thanh.
April 20 thawk in Sin-min operation min in Myingyan khuachung SAC ralkap nih hmunhma an khuarnak hmun 4 cu hmakhat te ah an kah hna.
SAC ralkap le pyusawhti minung 60 hrawng umnak Myingyan khua chaklei Irawaddy tiva kam ah a um mi Gyi khua cu MGN Tiger le a hawikom phu nih an kah hna hi a si.
Kahdohnak hi sml 3 hrawng a rau i sakhaan an lak khawh, SAC ralkap le pyusawhti 15 hrawng an thi tiah MGN Tiger nih an thanh.
SAC lei nih Semikhone tiva kam in bawmhnak an rak pek hna caah dothlennak phu lei an kir ṭhan, Myingyan pengkomh PDF No. 2 in hriamtlai Arka Min a nunnak a liam i adang hriamtlai 4 an i hliam tiah theih a si.
Gyi khua sakhaan lak kahdohnak ah 60 MM bom lung 9, MA-3 zuun 2, 5.56 kuan 125 an lak khawh.
Cun Myingyan peng hrambunh LIB 15 zong 107MM lung 2 in an kah i an i dornak buk a khen caah SAC ralkap 4 a khen hna i an thi tiah an langhter.
Cu bantuk in Myingyan peng, Semikhone tiva kam in SAC ralkap tilawng 2 le zung inn pawl zong Shock Missile in an kah hna leng ah Myingyan khuachung SAC ralkap hrambunhnak pawl zong drone in an foh hna tiah theih a si.thawngpang dang rel chap rih >>>>>>>>>.
Sagaing ramṭhen, Kawlin peng ah kahdohnak a fak i thi lo nung lo in a zaam mi SAC ralkap phu chung in a tlau mi SAC ralkap 1 cu dothlennak phu pawl nih an tlaih.
Corporal rank a si mi SAC ralkap 1 cu April 22 chun ah an tlaih hi a si.
Amah sin in 60MM BA-100 le kuan 2 zong an lak khawh tiah thawng theih a si.
Dothlennak phu pawl nih an tlaih mi Kawlin khua cu SAC nih February 4 zinglei thawk in a lut ṭhan i ni tlawmpal a rauh hnu ah khuachung ah hmunhma a khuar ṭhan.
Cu hnu ah dothlennak phu pawl he a phunphun in kahdohnak a chuak.
April 21 ah thazang 150 hrawng in a rak lut mi SAC ralkap phu pawl cu Kawlin khua nichuah lei ah Tazu khua pura tlang ah ah kah hna hi kahdohnak a fak.
Cu kahdohnak ah SAC ralkap 20 hrawng an thi i RPG 2 le kuan phun tampi 2,000 leng telh in hriam tampi zong an lak khawh tiah NUG kuttang No. 1 kahdohnak hmunhma nih an thanh.thawngdang >>>>>>>>
Kachin ram, Hpakan peng, Sezin khuate um SAC ralkap sakhaan cu April 24 zinglei sml 2:00am hrawng ah KIA, KPDF phufonh pawl nih an lak khawh tiah thawng theih a si.
Kachin ram le Sagaing ramṭhen um kahdohnak ah a biapi ngai mi Sezin khua palek sakhaan cu April 9 thawk in an kah i Sezin palek sakhaan bawi telh in palek 23 nih a sung an pek, Sezin khua hrambunh SAC ralkap Brigade 33 kuttang IB 116 sakhaan zong KIA le dothlennak phu pawl nih an lak chap.
Vanlawng nih nifatin in kahdoh a bawmh ko hna bu ah sakhaan an lak khawh hi a si i hriam tampi zong an lak khawh. Sakhaan lak kahdohnak chung ah KIA, KPDF hna nih hriamngan, Drone pawl hmang in nifatin an doh hna caah SAC ralkap a thi mi an tam i a tang mi ralkap pawl nih sakhaan an zaamtak tiah theih a si.
Sezin palek sakhaan le SAC ralkap sakhaan an lak khawh caah Hpakan-Tamakhan-Sezin lam ah SAC ralkap pawl an thiang i KIA, KPDF hna nih tlamtling tein an tlaih cang.
KIA, KPDF phufonh pawl nih Hpakan khua a luh khawh nak Sezin-Tamakhan-Hpakan lam, Nanya-Hpakan lam le Waikha-Hpakan lam tiah lampi 3 cu tlamtling tein an tlaih khawh cang.
Leave a Reply