Breaking News :Kahdohnak Ruang Ah Rak Khar Mi Myanmar–Thailand Ramri No.1 Chitkyiyee Hlei An On Ṭhan Cang

Kahdohnak Ruang Ah Rak Khar Mi Myanmar–Thailand Ramri No.1 Chitkyiyee Hlei An On Ṭhan Cang.Myanmar–Thailand ramri Karen ramkulh Myawaddy khuapi kahdohnak ruang ah ni 6 chung rak khar mi Myanmar–Thailand ramri No.1 Chitkyiyee hleipi cu nihin April 27 zinglei suimilam 10:00 hrawng ah an on ṭhan cang i hlei luhnak ah mizapi i tlar in an hngak cio hna, tiah theih a si.

“Mi tam-u cu Mae Sot khuapi ah ni 7 caam ding in Border Pass cauk ah chingchiahnak nampiak duh ah Myawaddy ah a kir mi an si,” tiah hlei a hngak mi pakhat nih RFA a chimh.A luancia April 11 ni ah Khah-Lah-Yah 275 SAC ralkap pawl cu KNLA le PDF ṭangṭi phu nih an rak kah hna i SAC ralkap pawl cu Myawaddy lei No.2 hlei ah umhmun an rak khuar, cun April 19 zanlei ah KNLA le PDF ṭangṭi phu nih Drone in an kah hna i April 20 ni chun nitlak kaphnih kar kahdohnak a chuak i SAC ralkap nih vanlawng in kahdohnak an rak tuah, tiah theih a si.

SAC ralkap vanlawng kahdohnak ruang le kaphnih kar kahdohnak a fah ruang ah Myawaddy khuapi tualchung mi cu Thailang ram, Mae Sot khuapi ah an zaam hna i a cheu cu Thaungyin tivapi kam ah thlam sak in an i dor hna. April 21 ni ah Myanmar ralzaam pawl cu Thailand cozah nih Myawaddy khuapi ah a kuat hna hnu in Myanmar ram lei No.1 Chitkyiyee hlei zong an rak khar, tiah theih a si.

Mywaddy No.1 Chitkyiyee hleipi cu an on ṭhan cang nain chawlehnak ca ah hman mi No.2 Chitkyiyee hleipi cu nihin April 27 chun tiang ah an ong rih lo, tiah theih a si.

NUG Nih SAC Hriamnam Lak mi Phozar.NUG nih SAC ralhrang hmunkhuarnak lak hnu hriamnam lak mi phozar. Mandalay ramṭhen, Pyin Oo Lwin khuapi hrambunh Ralhriam cawnnak Defense Services Academy (DSA) kiangkap um SAC Ralkap hmun pakhat NUG ṭengnge hriamtlai nih an lak. Hriamnam an lak mi cu National Unity Government (NUG) Ministry of Defense nih maivan ah tholh.

Tha Yet Kone khuate hrambunh SAC hmunpi hi DSA in meng 10 fai a hlat. 14 April ah khan mizapi ralkap nih Drones hmangin bomb an rak thlak. A thaizing ah minung thazaang in an va nam hi a si. A rau lo, fawi tein 15 April zanlei ah an lak khawh. Hi Tha Yet Kone khuate humhaknak le lak ṭhan zalhnak ah SAC ralhrang 60 tluk an thihphah, tiah Ministry of Defense nih a chimchap.Credit :The Chin Post