Kalaymyo Chaklei Ah Kahdohnak A Faak I Pyidawthar Khua Cu SAC Ralhrang Nih An Khangh. Sagaing ramṭhen, Kalaymyo peng chaklei ah kahdohnak a faak i inn 1,000 hrawng umnak Pyidawthar khua cu SAC ralhrang nih an luhhnawh hnu May 1 zanlei sang ah mei in an khangh, tiah tualchung mi hna sin in theih a si.
“2024, April 30 le May 1 ah SAC ralhrang le Kalay peng dohthlennak hriamtlai ṭangṭi phu hna cu Pyidawthar khua pawng ah an i kap, cu hnu ah khua an khangh, Kalaymyo chaklei tualchung mi hna cu an zaam dih cang, SAC ralhrang nih rallam an sial i Drone zong in kahdohnak an tuah caah kannih zong kan zaamnak caan ni 3 hrawng a si cang” tiah tualchung mi nu pakhat nih a chim.
Tualchung mi hna cu a himnak hmun kawl in kan zaam dih caah inn zeizat a kangh ti mi cu fiang tein kan thei kho rih lo, tiah tualchung mi hna nih an chim.Crd: Lungmilipost
Relchap: Shan ramkulh chaklei, Ta’ang hmunram ah chuahcam lawmhnak an tuahnak hmun pakhat ah SAC ralhrang chuah mi Myanmar beer a ding mi TNLA ralkap chungtel hna cu dantatnak an tuah hna, tiah TNLA sin in theih a si.
“2024, May 2 ah kan kham mi Myanmar beer ding mi TNLA ralkap chungtel hna cu fung in voi 10 kan tuk hna pin ah thla khat chung rianhrang ṭuan ding le mizapi ta a si mi siizung le phungki sianginn thianhlimnak tuah ding in dantatnak kan tuah hna” tiah TNLA in ṭuanvo ngeitu pakhat nih a chim.
Cu pin ah TNLA nih a uk mi khuapi 7 le hmunram chung ah SAC ralhrang chuah mi thil pawl a ding-ei mi le cawkzuarhnak a tuahtu hna cu thawng kan thanh ning in dantat nan si lai, tiah an thanh.
A liamcia 2021, June 15 ah TNLA nih SAC ralhrang chuah mi thil paoh cu cawkzuarnak tuah lo ding le din-ei lo ding in an rak thanh hi a si. Lungmili Post
Leave a Reply