SAC Sakhan 2 An Kah Ralhrang 5 An Thi

Than Daung Gyi, Taungngu-Leiktho Kalnak Lam Pawng Um SAC Sakhan 2 An Kah Ralhrang 5 An Thi. Karen ramkulh, Than Daung Gyi peng, Taungngu-Leiktho kalnak lam pawng um SAC ralhrang sakhan 2 cu mipi ralkap nih sniper le hriamngan in an kah hna caah ralhrang 5 an thi, tiah Than Daung PDF nih an chim.

2024, May 1 zing suimilam 9:30 tluk ah Taungngu-Leiktho kalnak lam pawng um Kyauk Laung Gyi sakhan cu Taungngu pengkomh Brigade 2 battalion 5 kuttang People Defense Force Thandaung nih sniper in an kah hna i ralhrang 2 an thi, tiah theih a si.

Cu bantuk ṭhiam in 2024, April 8 zaan suimilam 8:30 in 10:00 tiang Taungngu-Leiktho kalnak lam pawng um meng 7 sakhan cu hriamngan 79 MM in voi 2 tiang an kah hna i ralhrang 3 an thi, tiah an langhter. CRD: Lungmilipost

Thawngpang dang: Tukum, 2024, April thla dongh ah tuah mi Chinland Council meeting ah chungtel thar pathum an cohlan hna tiah theih a si. Cu hna cu Mindat Council, Kanpetlet Council le Zanniat People Organization hna an si.

CDF-Mindat le CDF-Kanpetlet in cheukhat cu Chin Brotherhood ah an lut nain a tam deuh cu Chinland Council ah an lut ve. Mipi uknak in Chinland Council ah a lut mi zong hi anmah peng ah cun mipi tam deuh nih dirkamh mi le cohlan mi an si tiah Chinland Council in upa pakhat nih The Chin Post ah a chim.

Tutan meeting ah chungtel thar pathum an cohlan mi he cun Chinland Council ah aa tel mi dihlak phu 18 an si cang. Cu hna cu:

Tonzang Township Council, Hakha Central Council, Thangtlang Township Council, Matupi Township Council, Paletwa Council, Hualngoram People Organization, Senthang Central Council, Zopheiram Council, Lautu People Affairs Council, Zotung Federal Council, Maraland Council, Mindat Council, Kanpetlet Council, Zanniat People Organization, CDF KKG, CDM Siyin, CDF- Dai

le People Defense Army (PDA, Tedim) hna an si. Hmanthlak: A hnubik CC Meeting le CC chungtel dihlak cazin. The Chin Post