SAC nih Matupi khua ah a tuah nolh mi Chinram taang-10 caminpuai ah siangngakchia 34 lawng an phi, tiah SAC kuttang Chinram fimcawnnak zung director nih a chim.
“Hi siangngachia hna hi harnak tampi lak ah caminpuai a rak phi mi an si i, an zapite in teinak hmu kho hna seh tiin thla kan campiak hna,” tiah Chinram fimcawnnak zung director nih Khonumthung ah a chim.
March thla ah tuah mi taang-10 caminpuai a dih hnu ah SAC nih special in a timhtuah chap mi Chinram taang-10 caminpuai cu April 29 in May 6 tiang Matupi BEHS No. 2 ah an phi i, pa 10 le nu 24 nih caminpuai an phit hi a si.
March 11 in 19 tiang an rak tuah mi Chinram taang-10 caminpuai ah siangngakchia 1,723 nih caminpuai phit ding in min an pek nain a phi taktak mi cu siangngakchia 401 lawng an si, tiah theih a si.
Ni 60 chung ah rian chuah taak in i ap ding ah Kanpetlet peng chung Non-CDM pawl ralrin an pek hna>>>>>>>
Kanpetlet peng chung ah SAC kuttang rian a tuan lio mi Non-CDM pawl nih ni 60 chung ah rian chuah taak in rak i ap dih uh tiah Kanpetlet Peng Zapi Ukhruainak Bu nih ralrinpeknak ca an chuah.
Cu ralrin peknak cu nihin May 9 ah an chuah mi a si i, Non-CDM hna nih 2024 May 9 thawk in ni 60 chung ah i ap dih ding in ralrin an pek hna.
“Aa ap ding mi Non-CDM pawl nih zung ah hman lio mi asiloah zung ah chiah mi thilri, hmanrua, cazin le a dangdang hna cu Peng Ukhruainak Bu sin ningcang tein ap khawh nakding ah nan timh cia lai,” tiah an langhter.
Cun, 2024 July ni 7 tiang aa ap lo mi Non-CDM pawl cu hman lio mi upadi ning in hremnak pek nan si lai tiah ralrin peknak ca ah an tial.
Leave a Reply