Karenni Hriamtlai KNSO nih SAC kan Doh Ve Cang Lai tiah Thawng a Thanh. A luancia 2002 ah Myanmar ralkap he remhdaihnak a rak tuah mi Karenni National Solidarity Organization (KNSO) nih SAC ralkap kan doh ve cang lai, tiah nihin April 10 ah cathanh a chuah.
KNSO Headquarter a umnak Khe-Ma-Phyu khua cu SAC ralkap nih vanlawng in bomb a thlak pin ah Mawchi peng ah a um mi khuate pawl zong SAC ralkap nih hriampi in an kah caah KNSO le SAC karlak remhdaihnak a rawk cang, tiah KNSO nih cathanh ah a langhter.
Cucaah, Karenni ramkulh chung ah a cawlcaang mi hriamtlai bu hna le Karenni mizapi he i bawm in SAC ralkap kan do ve cang lai, tiah KNSO nih thawngthanhnak a tuah. The Hakha Post
Thawngpang dang: Thailand-Myanmar Ramri Um Myawaddy Khuapi Hngaktu SAC Sakhan Cu KNLA Nih An Laak. Thailand-Myanmar ramri, Karen ramkulh, Myawaddy hrambunh SAC ralhrang Khah-Lah-Yiah 275 battalion cu Karen National Liberation Army (KNLA) le PDF ṭangṭi phu hna nih an laak cang, tiah KNU in chimnak nawlngeitu Pado Saw Toni le Thailand ram thawng zamhnak hna nih nihin April 11 ah an chim.
“2024, April 10, zan suimilam 10:00 tluk ah Khah-Lah-Yiah 275 battalion cu an laak, SAC ralhrang Commander in Chief le a kuttang thazang 200 hrawng cu No.2 Chit-kyi-yi hleidonh lei ah hnulei an tolh” tiah Karen National Union (KNU) in chimnak nawlngeitu Pado Saw Toni nihcun a chim.
Atu hi Kawkareik le Myawaddy lei lampi cu SAC ralhrang nih thazaang an chap i an rak kai ṭhan caah kahdohnak a faak kho, SAC ralhrang nih Kawkareik le Myawaddy lei cu luhhnawh an timh ṭhan, tiah theih a si. “Nihin April 11, zing suimilam 5:00 tluk ah Hpa-An 201 battalion in SAC ralhrang motor 30 hrawng cu Asian lampi panh in an kai” tiah Hpa-An News nih a chim ve.
Karen National Liberation Army (KNLA) hruainak in Karen National Defence Organistion (KNDO) le dothlennak hriamtlai ṭangṭi phu hna nih Myawaddy khuapi ah a hnu bik taang mi SAC ralhrang Khah-lah-Yiah 275 battalion sakhan cu April 11, zing suimilam 4:20 tluk ah tlamtling tein an laak khawh cang i hriamnam tampi zong kan laak chih, atu hi zohfelnak le thianhliamnak an tuah cuahmah lio a si, tiah KNU nih phungning tein an thanh.
SAC ralhrang nih chun suimilam 11:00 tluk ah raltuknak vanlawng in pound 500 tluk a rit mi bomb cu Myawaddy khuapi pawng ah a thlak, tiah an langhter chih. Lungmili Post
Leave a Reply