Poi Ko :SAC Nih Luatnak An Pek Mi Hna Lak Ah Ramkhel Thongtla 91 Lawng An I Tel

SAC Nih Luatnak An Pek Mi Hna Lak Ah Ramkhel Thongtla 91 Lawng An I Tel.SAC nih luatnak an pek hna lak ah ramkhel thongtla 91 lawng an i tel, tiah Political Prisoners Network Myanmar(PPNM) nih an chim.Nizan April 17 ah SAC nih Myanmar ram hmun kip ah a um mi thonginn le palik sakhan ah thong an thlak mi 3,303 cu luatnak an pek hna i an thlah ṭhan cang hna, cu chung ah cun ramkhel thongtla 91 lawng an i tel.

“SAC nih luatnak a pek mi hna lak ah kum saupi thongtla ding in bia an ceihpi hna an i tel lo i, ramkhel thongtla luatnak a hmu mi an tlawm tuk, PPNM nih cazin kan khawmh mi ah thonginn 15 in ramkhel thongtla a luat mi 91 lawng an si,” tiah Political Prisoners Network Myanmar(PPNM) in ṭuanvo ngei Ko Theik Htun Oo nih a chim.

“SAC nih thongtla an luatter mi hna chung in chuah nicaan a phan deng mi minung zong an i tel,” tiah NLD Party Central Committee chungtel U Kyaw Htwe nih a chim. Luatnak hmu kho rih lo in thonginn ah a taang rih mi NLD chungtel 1,269 an um i, cu chung ah cun Parliament palai 65 an i tel.

Ramkhel thongtla zohkhentu phu(AAPP) nih a luancia April 12 ni tiang an langhter ning ah SAC ralkap nih hramhram in nawlngeihnak an laak hnu in tlaih a tong mi 26,524 an si i, minung 8,940 cu thong thlak ding in biaceihpiak mi an si.

Up Date : Good News :Hakha Khuapi Rungtlang Ah A Um Mi SAC Ralkap Pathum Cu CDF-Hakha Sin Ah An I Ap.
Chinram, Hakha khuapi, Rungtlang ah a um mi SAC ralkap pathum cu hramhram in nawlngeihnak a latu SAC ralkap rianṭuannak duh lo in pau dohthlennak ah i tel ve ding in nihin April 17 ah Chinland Defense Force – Hakha sin ah an i ap.

Rungtlang ah a um mi SAC ralkap pathum nih cun MA-1 pahnih, MA-2 pakhat, F1 Grenade 18 le MA kuan 1,000 i put in CDF-Hakha sin ah an i ap caah CDF-Hakha nih tangka Kyats sing 50 cio an pek hna.

Chinland Defense Force-Hakha sin ah CDM tuah in pau dohthlennak ah aa tel mi cu lunglawm tein kan cohlan hna i hriamnam he aa ap mi cu tangka Kyats sing 50 kan pek hna leng ah a himnak hmun an phak tiang ṭuanvo kan laak hna, tiah CDF-Hakha nih cun an thanh.

“SAC ralkap rianṭuannak doh in pau dohthlennak ah CDM in tel a duh mi paoh cu, Chinland Defense Force-Hakha pehtlaih khawh peng kan si i a himnak nan phak tiang ṭuanvo kan i laak hna lai,” tiah CDF-Hakha nih SAC chungtel pawl cu an sin i ap ding in lam an on piak hna.SAC ralkap nih hramhram in nawlngeihnak an laak hnu ah SAC ralkap le palik 40 leng cu Chinland Defense Force-Hakha sin ah an i ap cang, tiah theih a si.Credit : The Chin Post