Good NEWS: Thailand-Myanmar Ramri Um Uico Pawl An Zaam Dih Cang Ee

Thailand-Myanmar Ramri Um Mawhta SAC Sakhan In Ralhrang Pawl An Zaam Ca Ah KNLA Le PDF Fonh Nih An Laak.Tanintharyi ramṭhen, Dawei peng, Thailand-Myanmar ramri um Mawhta SAC sakhan in ralhrang pawl an zaam dih caah Karen National Liberation Army (KNLA) le PDF ṭangṭi phu hna nih meithal zuun 34, hriamthil pawl le sakhan cu an laak, tiah kahdohnak thawng latu hrampi nih a chim.

“2024, April 23, zing suimilam 9:50 tluk ah Thailand-Myanmar ramri ah thazaang 40 hrawng nih umhmun an khuarnak Mawhta SAC sakhan cu KNLA hruai mi dothlennak hriamtlai ṭangṭi phu hna nih kahdoh hram an thok i kap 2 kar kahdohnak a fah caah SAC ralhrang pawl cu April 24 zing ah cu sakhan cu chuahtak in an zaamtak hi a si, SAC sakhan cu KNLA le ṭangṭi phu hna nih tlamtling tein thianhlimnak le zohfelnak an tuah dih cang” tiah Khit Thit ah a chim.

Mawhta SAC ralhrang sakhan cu KNLA hruai mi dothlennak hriamtlai ṭangṭi phu hna nih an laak khawh dih hnu caan tlawmpal a rauh ah SAC ralhrang nih cunglei in kahdohnak a tuah, tiah theih a si. Lungmili Post

Thawngpang dang: Chin hriamtlai phu unau nih a kalpi mi Operation nih aa tinh mi bantukin Kyindwe khuapi kahdohnak ah SAC ralkap nih zeitluk hmanh in thazaang chap in vanlawng in kahdohnak tuah hmanh seh law hnu kan tolh hrimhrim lai lo, tiah Chin hriamtlai phu unau nih an thanh.

Chin hriamtlai phu unau nih Kyindwe khuapi kan laak hlan lo fak deuh in kahdohnak an kalpi lai i khuapi laaknak ding ca ah a lam kip in a kan bawmtu AA cung ah a hlei in lawmh bia kan chim, tiah Chin hriamtlai phu unau nih cun an thanh.

Kyindwe khuapi cu a liamcia 2023 December 22 ni in Chin hriamtlai phu unau nih kah hram an rak thawk i a luancia April 20 ni tiang kahdohnak an kalpi ko nain SAC ralkap nih ralkap thazaang chap in vanlawng in kahdohnak an tuah ruang ah Kyindwe khuapi an laak khawh rih lo kong Chin hriamtlai phu unau nih mizapi sin ah theihternak an tuah.

Chin hriamtlai phu unau ti mi cu Zomi Federal Union(ZFU), Chin National Organization(CNO), Chin National Council(Mindat), Maraland Territorial Council(MTC), Chin Defense Force – Kanpetlet(CDF-Kanpetlet) le Chinland Defense Force-Matupi(Brigade 1) i fonh in dirh mi phu a si. The Chin Post