Falam Peng Ah Kahdohnak Tuah Lo Ding In CNDF Nih CNA Theihter. A luancia April 24 ni ah Chin National Defense Force (CNDF) nih Falam peng ah kahdohnak tuah lo ding in Chin National Army (CNA) cu an theihter hna.
SAC ralkap an umnak Falam khua cu lak ṭhan ding ah CNO/CNDF nih kum cheu deng timhlamhnak kan ngei cang i a tlamtling lai zong kan zumh caah CNDF le Chin Unau (Chin Brotherhood) theihpinak le lungtlinpinak tel lo in kahdohnak nan tuah lai lo, tiah CNDF nih CNA cu ca an kuat hna. “CNA nih dothlennak nan tuahnak ah teinak hmu hram u” tiah CNDF nih an cakuat ahcun an langhter chih.
Atu bantuk ṭhiamṭhiam in PDF-Zoland zong nih a luancia April 17 ni ah Tedim peng ah kahdohnak tuah lo ding in CNA cu ralrin an rak pek hna. “Tedim khuapi laaknak ding ca ah zatuak 90 timhlamhnak kan ngei i, kahdohnak kan kalpi tikah a herh a si ahcun ṭangṭi ding in a hlankan in kan in theihter te ko hna lai, a hlankan in kanmah theihpinak le ceihmaipinak um lo in Tedim khuapi chung ah luhchuah le cawlcanghnak a um ahcun i timh lo ning in i kahnak a chuak kho mi a si caah PDF-Zoland nih cu bantuk cawlcanghnak cu kan kham,” tiah an thanh bal ve.
Cu kong he pehtlai in CNF/A chimnak nawlngei Salai Htet Ni nih cun, “Khuapi laak ding in kahdohnak kalpi timh mi kong ah hmunram ngeitu CDF cheukhat nih kan hmunram chung ah kahdohnak nan tuah kho lo tiin ca in seiseh an bia in siseh an kan ti tawn ti mi cu ngaihchia ngai a si, asinain kahdohnak cu hngah awk a ṭha lo i anmah caan pek awk an ṭhat lo caah kan si khawh chung in kahdohnak kan kalpi ko lai,” tiah Chinland Information Center(CIC) ah a chim.Thechinpost
Thawngpang dang: Pawngkam Mi Nih An Report Hna Ruang Ah Myanmar Ram Mi 20 Leng Cu Thailand Ah Tlaih An Tong. Thailand ram, Chonburi pengkomh, Pattaya khuapi chung innkhan 2 ah khuasa mi hna cu report an ton caah Thailand ram Lah-Wah-Kah le palik nih luhhnawh in an kawl hna i phungnung lo in a lut mi Myanmar ram mi 21 cu tlaih an si, tiah Thailand ram thawng zamhnak Pattaya Mail nih a langhter.
Myanmar ram mi 21 nih an hlan mi innkhan 2 ah pa 19 le nu 2 an um i pawngkam mi nih report an tuah ruang ah atu bantuk in an tlaih hna hi a si. Tlaih a tong mi hna cu an chekhlat hna i ramdang kalnak (Passport) le Thailand ram luhnak nawl (visa) a ngei lo mi an i tel i Updadi ning in dantat an si lai, tiah a langhter. Atu bantuk in tlaih a tong mi hna cu zan ah hna an chet i dawhcah lo in an um lengmang ruang ah pawngkam mi hnahnawhnak an kan pek tiin an report hna hi a si, tiah Pattaya Mail nihcun a langhter chih. Lungmilipost
Leave a Reply