CDF-Matupi Battalion Pali Cu I Fonh In Brigade-2 An Dirh.Chinram thlanglei, Matupi peng ah hramhbunh mi CDF-Matupi nih a voi thumnak Conference cu a luancia February 23-25 tiang Matupi peng Department kip, dohthlennak ah thazaang a chuahtu mizapi le Battalion kip in hruaitu hna he an tuah i, Battalion-2, Battalion-3, Battalion-4 le Battalion-6 cu i fonh in Brigade-2 in an dir kong nihin April 14 ah CDF-Matupi Brigade-2 nih an thanh.
CDF-Matupi Brigade-2 dirh a si hnu ah CDF-Matupi Brigade-2 nih April 10-11 ah a voi khatnak Conference tuah in Brigade-2 nih aa tinh mi le phunghrampi suaisamnak an ngeih kong an thanh chih.
Matupi peng khua 63 a um mi ah CDF-Matupi Brigade-2 nih a uk mi khua 43 a si, CDF-Matupi Brigade-2 he ramkhel lei ah duhnak aa khat mi khua 50 leng an um i mizapi nih thim mi a dik mi ramkhel cu mizapi he ralṭha ngaiin kan kalpi lai, tiah CDF-Matupi Brigade-2 nih an thanh mi ah an langhter.Kamkhat lei ah CDF-Matupi Battalion-1 le Battalion-5 cu Brigade-1 in an dir ve i Chin hriamtlai phu unau sin ah i fonh ve, tiah theih a si.
Thawngpang Dang Up Date :Thaizing zingka tein thok ding mi UFC 300 puai hi UFC zoh a huam mi ca ah cun zoh lo ah a paam tuk lai. UFC 300 ah hin fighter ṭhaṭha an i ṭhuat lai caah MMA zoh a huam mi nih an i ngaih khun. Zarhfatin UFC puai cu a um nain hi bantuk puai number tling(100, 200, 300 tibantuk) puai sunglawi hi cu kum kua-hra dan lawng ah a um tawn mi a si.
UFC 300 hi an i timhtuahnak zong a sau cang caah a hramthok bik aa ṭhua ding pawl zong min ngei cia, Champion taisawm a rak la bal cang mi an thim hna. Tutan UFC 300 main event ah hin Brazil mi puarhrang, Middleweight le Light Heavyweight champion a si mi Alex Pereira le Light Heavyweight champion hlun Jamahal Hill cu Light Heavyweight ah an i ṭhua lai i, Hill nih Pereira Taisawm chuh aa zuam lai.
Co-main event ah Tuluk nu pahnih; Zhang Weili le Yan Xionan an i phomh lai i, Weili nih a Stawweight sui taisawm runven aa zuam ve lai. Hi bantuk puai sunglawi ah Tuluk nu pahnih an i ṭhuat khawh mi hi tuanbia thar a si i, Tuluk le Tuluk nih sui taisawm an i cuh zong a voikhatnak ṭhiam a si.
UFC 300 ah fans lei nih an i ngaih bik mi pakhat cu BMF title aa cuh ding mi hi an si. Featherweight legend, Knockout a tong bal lo mi Max Holloway le Lightweight velh thiam Justin Geathje hna cu 155 lbs an i phomh lai i, Baddest Mother F**ker- BMF taisawm an i cuh lai.
Hi hna pinah minthang aa ṭhua ding a tor rih; UFC Champion a rak si cang mi Jiri Prochazca, Charles Olivera, Aljamain Sterling, Holy Holm, Deivason Figueredo le Cody Garbrandt hna zong an i phomh lai.
UFC 300 zoh a nuamh rih nak ding a si rih mi cu voidang ah Bonus $ 50k an pek tawn mi kha UFC President Dana White nih $300k pek ding a hna tla. An hlawh pinah $300k bonus co ding in fighter pawl nih an thiamnak le thazaang dihlak an chuah hrimhrim lai caah voidang bantuk nakin zoh a nuam deuh hrim lai.UFC 300 hi thaizing April 14, zinglei suimilam 4:30(Myanmar caan) ah an thok lai i, Main Card cu 8:30 am ah an thok te lai.Credit : The Chin Post
Leave a Reply