CDF-Matupi Battalion Pali Cu I Fonh In Brigade-2 An Dirh

CDF-Matupi Battalion Pali Cu I Fonh In Brigade-2 An Dirh. Chinram thlanglei, Matupi peng ah hramhbunh mi CDF-Matupi nih a voi thumnak Conference cu a luancia February 23-25 tiang Matupi peng Department kip, dohthlennak ah thazaang a chuahtu mizapi le Battalion kip in hruaitu hna he an tuah i, Battalion-2, Battalion-3, Battalion-4 le Battalion-6 cu i fonh in Brigade-2 in an dir kong nihin April 14 ah CDF-Matupi Brigade-2 nih an thanh.

CDF-Matupi Brigade-2 dirh a si hnu ah CDF-Matupi Brigade-2 nih April 10-11 ah a voi khatnak Conference tuah in Brigade-2 nih aa tinh mi le phunghrampi suaisamnak an ngeih kong an thanh chih.

Matupi peng khua 63 a um mi ah CDF-Matupi Brigade-2 nih a uk mi khua 43 a si, CDF-Matupi Brigade-2 he ramkhel lei ah duhnak aa khat mi khua 50 leng an um i mizapi nih thim mi a dik mi ramkhel cu mizapi he ralṭha ngaiin kan kalpi lai, tiah CDF-Matupi Brigade-2 nih an thanh mi ah an langhter.

Kamkhat lei ah CDF-Matupi Battalion-1 le Battalion-5 cu Brigade-1 in an dir ve i Chin hriamtlai phu unau sin ah i fonh ve, tiah theih a si. The Chin Post

Relchap: Malaysia Ah Malsawm Khuami Ngakchia 1 Hmaikhah Pa Nih A Thah. Chin ramkulh, Hakha peng, Malsawm khuami ngakchia pakhat cu Malaysia ah Hmaikhah khuami pa 1 nih a thah, tiah theih a si.

2024, April 14 zing ah Hakha peng, Malsawm khuami Pu Biak Tha Lian le Pi Tha Tin Hnem hna i an fapa Peter Biak Ṭha Cung (kum 7) cu Malaysia ah an umnak innkhan pawng a um vemi Hmaikhah khuami pa pakhat nih a hnawng in a dih i a thi, tiah a mah he aa neihniam mi Malsawm khuami pakhat nih Lungmili Post ah a chim.

“Peter hi a nu le a upa he Malaysia ah inn hlan in um mi an si. A that tu pa hi an inn hlan nak innkhan pawng te ah inn a hlang vemi a si i Peter he hin game hna an i celh ṭi tawn. A thah dih hnu ah a upa sin ah a va kal i na nau hi aa hngilh sau ngai va zoh te hmanh tiah a chimh ta i a zaam,” tiah a chim. Lungmili Post