KIA le KPDF nih Sumprabum Khua i SAC Ralkap Sakhaan Nganpi an Laak >>>>>>>>>>

Kachin ramkulh, Buda-O peng, Sumprabum khua i SAC ralkap sakhaan nganpi cu KIA le KPDF nih tlamtling te in an laak khawh cang, tiah theih a si.

Sumprabum khua ah hin SAC ralkap bu Kha-La-Ya (46) hmun an khuar i, SAC ralkap thazaang 250 hrawng an an umnak a si, tiah Khit Thit Media nih a ṭial.

KIA le KPDF nih Sumprabum SAC ralkap sakaan cu thla hnih chung faakpi in an doh i, nihin May 5 zinglei ah an laak khawh.

KIA chimnak nawlngei Colonel Naw Bu nih, “Nihin zinglei ah Sumprabum SAC ralkap sakhaan Kha-La-Ya (46) cu kan laak cang. Sumprabum ah hin SAC ralkap hi hmun 3 ah an um. Outpost pahnih an taang rih i, laak ding in kan doh cuahmah lio a si,” tiah Irrawaddy ah a chim.

Aluancia March 7 thawk khan Kachin ramkulh chung i SAC ralkap sakhaan pawl cu KIA le KPDF nih doh hram an rak thawk i nihin ni tiang ah sakhaan ngangan le sakhaan a fa mi pawl fonh in SAC ralkap sakhaan 70 leng an laak cang, tiah theih a si.

SAC miakpi ruang ah Kalay peng ah khuami pakhat a thi i pathum hma an pu>>>>>>>>>>>>

 Kalay peng Thlanglei, Tinta khua ah SAC ralkap kah mi miakpi a tlak caah sualnak ngei lo khuami pakhat a thi i bawhte tel in minung pathum hma an pu tiah theih a si.

Cucu Nizan May 3 zanlei sml. 2:30 ah a cang mi a si. Kum 42 nutung pakhat a thi i a vapa zong hma a pu tiah tualchung mi nih an chim.

SAC ralkap pawl cu Tinta khua ah umhmun an khuar i cuka cun miakpi heh tiah an kah tiah theih a si.

Hma a pu mi hna cu NUG kuttang Pah-Kah-Phah nih minung pakhat ah Kyats thong 50 cio an bawmh hna tiah theih a si.