Good News: Khah-Lah-Yah 103 Battalion Commander Telh In SAC Ralkap Hriamnam Chiahmi Hna Pawl. An Tam Ngamsam

KNU Brigade 4 Hmunram Ah SAC Rallam An Kah  I 6 An Thi, Khah-Lah-Yah 103 Battalion Commander Telh In SAC Chungtel 48 Nih Hriamnam An Chiah. Tanintharyi ramṭhen, KNU Brigade 4 hmunram chungah sakhan chuahtaak mi SAC ralhrang rallam cu KNLA nih rak bawk in an kah hna caah ralhrang 6 an thi, Khah-Lah-Yah 103 battalion commander Aung Hit le SAC chungtel 48 nih hriamnam an chiah tiah KNU nih an langhter.

2024, April 15 ah Tanintharyi ramṭhen, KNU Brigade 4 hmunram chung Mawta hmunhma le Hteeta khua Khah-Lah-Yah 103 battalion umhmun khuarnak sakhan chuahtaak in Hteeta sakhan ah fonh aa timmi SAC rallam sialmi pawl cu KNLA nih rak bawk in an kah hna caah ralhrang 6 an thi, Khah-Lah-Yah 103 battalion commander Aung Hit telhchih in SAC chungtel 48 nih hriamnam an chiah caah SAC sin in hriamngan, hriamhme 67 an laak chih, tiah theih a si.

Khah-Lah-Yah 103 battalion commander Aung Hit telhchih in SAC chungtel 48 hriamnam chia mi hna cu KNU ṭuanvo ngeitu hna nih an zohkhenh hna tiah theih chih a si. The Chin Post

Thawngpang dang: Mizoram ramkulh, Siaha khuapi in Chinram, Thantlang peng, Vuangtu khua lei ah khualtlawng mi 17 nih an i cit mi Pickup motor cu Lungbun le Tipi karlak an phak 2024, April 13 zanlei sang ah Accident a tong, tiah theih a si.

“Siaha khuapi in kan rak chuak i ramri um tiva kan phak hlan Lungban le tiva karlak kan phak zanlei suimilam 5:30 tluk ah atu bantuk in kan motor aa lehsual hi a si, motor Brake a ṭhat lo ruang ah a si i Pu Mang Cung (kum 50) hrawng cu hmakhat te ah a nunnak liam” tiah motor aa cit ve mi Vuangtu khua mi pakhat nih a chim.

Motor aa cit mi dihlak hi minung 17 kan si, mah lak ah kum 1 leng ngakchia 1 le kum khat hmanh a tling rih lo mi ngakchia 1 zong an i tel i minung 9 nih hliam an tuar. Hliam a tuar mi hna cu Siaha khuapi sii-inn ah an kalpi hna i hliamhma faak deuh mi 3 hna cu Aizawl khuapi sii-innpi ah an lanhpi hna, tiah a chim chap.

Motor Accident nakin nunnak liam mi Pu Mang Cung hi hlaphuah le hlasak lei zong ah bochan ngai mi a si i April 14 ah a ruak cu a chuahnak Vuangtu khua ah an vui, tiah theih a si. Lungmili Post