Malaysia Ah Helicopter 2 Pahsualnak In Aa Cit Mi Minung 10 Nunnak A Liam. Malaysia ram ah ti ralkap hna nih ralkap ni camtuak ah langhter ding in raltuk cawnnak an ngeih lio ah helicopter 2 cu an i pahsual i aa cit mi minung 10 an nunnak a liam, tiah theih a si.
(Malay caan in) Nihin 2024, April 23, zing suimilam 9:00 hrawng ah Malaysia ti ralkap hna hrambunhnak hmun pakhat a si mi Lumut, Perak ah an i pahsual hi a si, tiah Maylaysia thawng zamhnak hna nih an langhter.
Cung ah a zuang lio mi “HOM M503-3” helicopter le “Fennec M502-6” helicopter cu an i pahsual caah aa cit mi minung 10 hna cu an dihlak in an nunnak a liam, tiah an langhter chih. Lungmili Post
Thawngpang dang: Chief Minister Pu Pa Thang hruai mi Chinland cozah upa hna cu 2024, April 13 in 19 tiang Zophei hmunram, Lautu hmunram, Zotung hmunram le Senthang hmunram khuakhangtu bu hna le tualchung mi hna cu tonnak an ngeih hna i hmunram (pengtlang) uknak kong, cozah rianṭuannak ca ah a herh mi le Chinland cozah kong he pehtlai in biaruahnak an ngeih hna, tiah Chinland cozah nih an thanh.
“Chinland cozah le hmunram (pengtlang) khuakhangtu bu karlak pehtlaih khawhnak ding caah Federal phunglam ning in pengtlang (pengtlang) uknak phung ser i cu ning cun uknak kalpi a herh nakkong, Chin miphun hna nih kan ngeih bal lo mi mahte uknak kongah kanmah tein kan ser mi phunglam cu atu ahcun Chin miphun hna nih kan fehter khawh cang nakkong, Chinland Cozah cu mizapi he hmunkhat ah dir in Chinram le Chin miphun hna zawnruahnak he ukhruainak an kalpi lai nakkong, mizapi nih Chinland cozah a ṭhawn khawhnak ding ah dirkamh a herh nakkong cu” Chinland Chief Minister nih a chim.
An khualtlawnnak ahcun Chinland cozah in Minister of Humanitarian Affairs and Rehabilitation, Minister of Home Affairs le Minister of Construction hna zong an i tel ve, tiah an langhter chih.
Leave a Reply