Kalay Peng Ah SAC Hriamngan Khennak In Nunnak Liam Mi Hna Ruak An Thlah Lio Ah Hriamngan An Kah I Minung 2 An Thi Ṭhan. Sagaing ramṭhen, Kalay peng ah SAC ralhrang nih an kah mi hriamngan kuan khennak in nunnak liam mi tualchung mi hna ruak an thlah hna lio ah SAC ralhrang nih hriamngan in an kah ṭhan hna i tualchung mi 2 an nunnak a liam ṭhan, ni 2 chung ah SAC ralhrang hriamngan kahnak in tualchung mi 6 an nunnak a liam, tiah theih a si.
2024, April 24, zanlei sang ah SAC ralhrang kah mi hriamngan kuan khennak in Pyin Taw Oo (Tuingo) khua mi kuam 10 hrawng ngakchia 2 le kum 65 pa 1 nunnak a liam i hliam a tuar mi nu 1 zong April 25 ah a nunnak liam ve, tiah taulchung mi hna nih an chim.
“Atu bantuk in nunnak liam mi hna cu April 25 chun ah an ruak an thlah hna i cu lio ah SAC ralhrang nih hriamngan in an kah hna caah mino 2 an nunnak a liam ṭhan” tiah tualchung mi pakhat nih a chim.
Nunnak liam mi mino 2 cu Nyaungkone khua mi Salai Khup Tuang Kim (Kum 26) le Salai Piang Khan Suam (Kum 30) hna an si i April 24 le 25 ni 2 chung lawng ah SAC hriamngan kahnak in tualchung mi 6 an nunnak a liam, tiah theih a si.
Kalaymyo peng chung ah 2024, February 21 in April 21 tiang thla 2 chung ah SAC ralhrang kut in ngakchia telh in tualchung mi 80 nunnak a liam, tiah Kalaymyo mizapi ukhruainak Committee nih phungning tein an rak thanh. Lungmili Post
Leave a Reply