India-Myanmar Ramri Hon Ṭhan A Si I May 1 Khar Ding Zong Let Ṭhan A Si. India-Myanmar ramhnih ramri luhchuahnak India cozah nih an kham mi cu an let ṭhan i nizan zanlei 2 thawk in Rih-Zokhuathar kalnak zong an hon ṭhan, tiah theih a si.
India ram Lok Sabha thimnak ruang ah India-Myanmar No.2 ramri chawlehthalnak Rih-Zokhuathar hlei cu April 17 in 19 tiang an rak khar.
Thimnak a dih hnu April 20 zanlei ah Rih-Zokhuathar hlei cu an hon ṭhan nain India Home Ministry nawlpek ning in Assam Rifles nih ramhnih kar luhchuah an rengh i Myanmar lei in siang ngakchia pawl le ngamdamnak he pehtlai in emergency a si mi pawl cu theihthiamnak in luhnak nawl pek an si.
Assam Rifles cu Mizoram Champhai district ramri khuate pawl ah khua upa le khuabawi te he i tonnak an ngei i India-Myanmar ramri cu April 20 in 30 tiang theihthiamnak in luhchuah a ngah nain May 1 thok in khar ṭhan a si lai, tiah an chim.
Asinain nizan April 25 zanlei ah India-Myanmar ramri chawlehthalnak lampi Rih-Zokhuathar ramri gate hlei cu India lei nih an hon ṭhan.
Cu lawng si loin May 1 in ramri chawlehthalnak lampi kan phih dih lai an timi zong India cozah nih a let ṭhan chung ,tiah theih a si.
India-Myanmar ramri khar ding a si ahcun Mizoram le Chinram ramri um khua zapi eidin kawlhawlnak an har tuk khawh caah tualchung mizapi le khua upa hna nih ramri phihkhar cu an duhlonak an rak langhter. The Chin Post
Leave a Reply