Update. Mindat Peng Ah SAC Ralhrang Bomb Thlaknak In Tualchung Mi 4 Nunnak Liam I Hliamtuar An Tam. Chin ramkulh, Mindat peng, Vawmtu siizung cu SAC ralhrang nih cunglei in bomb a thlak caah a rawk dih i tualchung mi 4 nunnak a liam pin ah minung 10nak tlawm lo nih hliam an tuar, tiah CDF-Mindat in ṭuanvo ngeitu pakhat nih a chim.
Nizan 2024, April 25, zan suimilam 8:00 tluk ah SAC ralhrang nih raltuknak vanlawng in bomb a thlak i siizung ah aa thlop mi tualchung mi mizaw 4 nunnak a liam, minung 10nak tlawm lo nih hliam an tuar i siizung cu a rawk dih, tiah theih a si.
“Siizung ah aa thlop lio mi tualchung mi 4 nunnak a liam i minung 10nak tlawm lo nih hliam an tuar, siizung zong a rawk dih, nizan cu chunnitlak zankhuadei ti awk in kahdohnak a tuah, Mindat peng chung ah kahdohnak zeihmanh a um loh” tiah CDF-Mindat in ṭuanvo ngeitu pakhat nihcun a chim.
SAC ralhrang nih bomb a thlak hnawh mi Vawmtu khua cu SAC ralhrang kuttang rianṭuan Council chungtel Pu Maung Ha khua a si. Mindat peng, Kanpetlet peng, Matupi peng, Yaw hmunram, Myaing peng le Pakokku peng in mizaw a tam-u cu Vawmtu siizung ah an rak i thlop hna, tiah theih a si.
A luancia April 25, zanlei suimilam 4:30 tluk zong ah Mindat peng Station (2) chung ah SAC ralhrang nih raltuknak vanlawng in voi 2, Y12 vanlawng in voi 5 ( Voikhat thlak ah bomb 10 hrawng) a thlak, tiah theih chih a si. Lungmili Post
Leave a Reply