Buthidaung No.15 Operation Command Division Headquaters In SAC Ralkap 100 Leng AA Sin Ah An I Ap.Rakhine ramkulh, Buthidaung No.15 Operation Command Division Headquaters in, Colonel telh in SAC ralkap le an chungkhar minung 100 leng cu AA sin ah hriamnam chiah in an i ap kong AA nih nihin May 6 an thanh.
Buthidaung peng ah hrambunh mi No.15 Operation Command Headquaters telh in Battalion Headquaters 5, Maungdaw peng Headquaters 4 telh in SAC ralkap sakhan ngan mi 9 hrawng cu AA nih an laak kong nihin ah phungning tein an thanh.
Buthidaung No.5 Operation Command Division Headquaters cu AA nih caan saupi chung an kah hnu ah a luancia April thla donghlei ah ralkap thazaang chap in fak deuh in an kah hnu ah an laak khawh. Cu kahdohnak ah cun AA nih hriamnam le SAC ralkap hman mi thilri pawl an laak pin ah minung 100 leng an i ap, tiah theih a si.
AA nih an laak mi Khah-Mah-Yah 551 le Buthidaung No.5 Operation Command Division Headquaters in i ap duh lo in a zaam mi SAC ralkap pawl cu dawi in Buthidaung peng, Tanshauk khua ah an kah ṭhan hna i an thi mi le hliampu mi an tam, tiah theih a si.
Kalaymyo Kiangkap Kahdohnak Ah Tualchung Mi 10 Le Tualchung Hriamtlai Phu In Minung Pahnih Nunnak A Liam.Sagaing ramṭhen, Kalaymyo chaklei, Pyidawthar khua pawng May 4 ni i kahdohnak ah tualchung mi 10 le tualchung hriamtlai phu in minung pahnih an thi, a dang minung 9 hliam an tuar, tiah mi bawmchantu phu nih an chim.
May 4 ni zinglei thawk in Pyidawthar khua pawng ah SAC ralkap le Kalay peng tualchung hriamtlai phu kar kahdohnak a fak i SAC ralkap nih Drone in bomb an thlak i hriamngan voi 80 hrawng an kah ruang ah tualchung mi 10 le tualchung hriamtlai phu pahnih a hmun ah an nunnak a liam colh, atu cu a him lo ngai caah a thi mi hna an min fiang in an langhter rih lo, tiah mi bawmchantu phu nih cun an chim.
Kalaymyo chaklei thla thum chung hrawng kahdohnak SAC ralkap nih kahdohnak a um lonak hmun ah Drone in bomb an thlak lengmang, Letpanchaung khua pawng ah rallam sial mi SAC ralkap 200 hrawng nih inn an khangh, tiah tualchung mi nih an chim.
Kahdohnak ruang ah Nanchaung, Segyi, Yaukchokwin, Sedaw, Pyinkhonkyi, Pyinkhonlay, Pyidawthar, Letpanchaung, Pyindawu le Kyaungtaik khua tualchung mi 10,000 leng cu ral an zaam hna i eidin tirawl, laakhruak hman mi tirawl le umnak ding Silpaulin an herh ngaingai, tiah an chim.
Kalay peng mi bawmchantu phu nih cazin an khawmh mi ning ah Kalay chaklei ah SAC ralkap nih inn 1,000 leng an khangh cang i tualchung mi 2,000 hrawng cu Chinram, Rihkhawdar lei le Mizoram ramkulh, Aizawl khuapi ah an zaam hna hna.Ramkhel tongthla zohkhentu phu AAPP nih May 3 ni tiang an langhter ning ah SAC ralkap nih hramhram in nawlngeihnak hnu kum thum leng chung ah Myanmar ram hmun kip ah SAC ralkap kut in tualchung mi 4,962 an nunnak a liam cang.Credit: The Chin Post
Leave a Reply