Karenni Ramkulh Bawlakhe Peng Ah Karenni Hriamtlai Ṭangṭi Phu Nih SAC Ralkap Helicopter An Thlak.Karenni ramkulh, Bawlakhe peng ah SAC ralkap Helicopter pakhat cu Karenni hriamtlai ṭangṭi phu nih an thlak kong KA ralbawi Colonel Bone Naing nih fehter in a chim.
Nihin March 6, zinglei suimilam 10:00 hrawng ah Hpasawng peng ah a zuang mi SAC ralkap Helicopter pakhat cu Karenni hriamtlai ṭangṭi phu nih Bawlakhe peng ah an thlak, tiah theih a si.
“Helicopter cu Hpasawng peng ah an khen i Bawlakhe phanh hlan ah a tla, pehtlaihnak a har ngai caah a tlaknak hmunhma belte fiang in hngalh a si rih lo nain a tla ti mi tu cu fehter khawh a si ko, a tla mi Helicopter hi Mi17 a si lai zumh a si,” tiah KA ralbawi Colonel Bone Naing nih cun a chim.
SAC ralkap nih hramhram in nawlngeihnak an laak ni thawk in SAC ralkap thilphurtu Helicopter le raltuknak Helicopter telh in Helicopter 7 cu tlangcung hriamtlai phu le PDF nih an thlak khawh cang i, nihin i an thlak mi raltuknak Helicopter he cun a zate Helicopter 8 an thlak khawh cang.
Thawngpang Dang Rak Rel Chih :Thlichia Le Rial Nih Bungkhua IDPs Camp Inn 137 A Hrawh.A luancia May 2 ah Mizoram le Chinram ah hrang mi thlichia le rial nih khuakip ah inn tam ngai a hrawh i, Thantlang peng, Bungkhua IDPs ralzam inn 137 zong an rawk dih, tiah Bungkhua IDPs Seccretary Salai Van Co Kam nih The Chin Post ah a chim.
May 2 zan a hrang mi thlichia le ruah lak ah hin rial zong an i tel caah Chinram, Thantlang peng khua cheukhat ah inn cungcih a pem mi an tam, tiah theih a si. Bungkhua IDPs camp zong hi thlichia nih a hawh mi pinah rial nih a pemh mi an tam. Inn a rawk mi lak ah thlop awk ṭha lo tiang in a rawk mi tam ngai an um, tiah theih a si. Pehtlaihnak lei ah harnak a um ruangah tuan ah thawngpang kan hlat kho lo i, Bungkhua lei zong in thawng an kan thanh kho lo.
Ralzam bawmhnak an hmuh chun tein canpheo an cawk i ralzam inn a rawk mi hna cu sakremhnak an tuah. May 2 zan a rawk mi inn an remh cia mi inn 4 cu zahan zan(May 5) a hrang mi thlichia nih a hrawh chap. Ralzam inn a rawk mi hna hi a cungcih dihlak thlen cawk a si lo caah an ihnak cung zawn lawng an thlenpiak hna kong IDPs secretary nih cun a chimchap.
Kan hlat khawh tawk ah tutan thlichia ruangah inn a rawk mi hna cu Lungler khua ah inn 50 hrawng, Sihhmuh khua ah inn 30 hrawng, Ruakhua 52, Vanzang 23, Hmunlipi 7, Thau 10, Bungkhua IDP camp inn 137 an si i hi pinah khua dangdang a rawk mi kan hlat khawh lo mi an um lai, zumh a si.Credit : The Chin Post
Leave a Reply