Nihin May 6 ah Rakhine ramkulh, Kyauktaw peng, Alaykyun khua cu SAC nih vanlawng in bomb a thlak i sualnak ngei lo khuami 3 nak tlawm lo an thi tiah theih a si.
“Zinglei sml. 8:00 hrawng ah vanlawng in bomb a rak thlak i a thi mi chung ah pa pahnih le nu pakhat an i tel,” tiah khuami pakhat nih a chim.
Alaykyun khua cu chungkhar 500 hrawng an umnak khuate a si i, Kyauktaw peng chung kahdohnak ruang ah raal a zaam ve mi khua an si.
May 1 ah SAC nih Rakhine ramkulh Kyauktaw le Minbya peng ah bomg a rak thlak i khuami 12 hma an pu. May 4 zong ah Buthidaung khuachung siang inn pakhat ah bomb a thlak i cuka ah aa dor mi Muslim 4 an thi, 15 nak tlawm lo hma an pu tiah theih a si.
Buthidaung OCH-15 in Commander changtu le ralkap pawl nih AA sin ah hriam an chiah>>>>>>>>>>>>
Rakhine ramkulh, Buthidaung hrambunh OCH-15 (Sah-Kah-Khah 15) SAC ralkap hmunpi cu AA nih an laak lio ah Commander changtu tel in SAC ralkap hna le an chungkhar hna nih hriam an chiah tiah AA nih video he a langhter.
AA nih a langhter mi video ah SAC ralkap hna, ralkap chungkhar hna le hma a pu mi hna hmuh an si. Cun SAC ralkap nih training an pek mi hna Rohingya pawl zong an i tel ti a si. Hriam a chia mi dihlak zat belte cu AA nih an thanhchih lo.
Buthidaung hrambunh No. 15 Operations Command Headquarter (Sah-Kah-Khah 15) le a kuttang ralkap camp pawl cu ni 12 chung an kah hna hnu, May 2 ah Rakhine hriamtlai AA nih an laak khawh mi a si.
OCH-15 cu caan zeimaw zat an kah hnu, an luat khawh ti lo caah SAC ralkap nih hriam an chiah mi a si tiah AA thawngthanhnak ah an langhter.
Leave a Reply