Kyindwe Khuapi Ah SAC Nih Thazaang A Chap Than Caah,Kuapi Tlamtlingin Laak Fel A Si Rih Lo. Chin ramkulh,Kanpetlet peng Kyindwe khuapi cu nizan April 29 ah an laak khawh cang tiah thawngpang a leng len nain SAC nih ralkap thazaang a chap i vanlei in kahdohnak pehtlai in a tuah hna caah tlamtlingin laak khawh a si rih lo.
“Kyindwe khuapi kan laa kho rih lo,SAC lei nih thazaang le hriamnam a chap i vanlei in kahdohnak faak piin a tuah caah kan laa kho rih lo,thazaang a chap thar mi lawng i minung 500 leng an si lai” tiah CDF-Kanpetlet in rianngeitu pakhat nih a chim.
Kyindwe khua hi Chin brotherhood ai timi hna nih AA bawmh hal in a luancia March 7 khan kahdoh an rak thok mi a si. Crd: CBN Daily News
Thawngpang dang: Hpasawng peng, ah SAC nih thla 2 chung tluk ralphaw ah an tlaihkhih mi hna tualchung mi 18 cu SAC nih an chuah ṭhan hna tiah Karenni ramkulh, Hpasawng PDF chungin ṭuanvo ngeitu pakhat nih a chim.
2024, April 29 ah SAC ralhrang nih an chuah ṭhan mi hna tualchung mi 18 hi kum khua upa, naupawi le ngakchia deuh hna an si i PDF nih hmunhimnak hmun ah an chiah hna tiah an langhter.
Ralphaw ah tlaihkhih mi hna hi SAC ralhrang nih a phun phun in an ṭhihphaih hna caah tualchung mi 10 an taang rih tiah theih a si.
April 23 zong ah Hpasawng khuapi, Kwetthit sang Phungki sianginn ah aa taap mi tualchung mi 130 leng cu Karenni ṭangṭi phufonh nih an rak chanhchuah hna.
2024, February 29 ah thawk in Hpasawng khuapi kahdohnak ah SAC ralhrang hrambunh sakhan tampi cu Karenni ṭangṭi phufonh nih an laak khawh cang tiah theih a si.
Leave a Reply