Myanmar Ram Chung Hmunram Zatuak 60 Cu Kan Uk Cang – NUG. “Tlangcung hriamtlai phu hna le NUG nih ramri chawlehnak hmun khuapi 5 telh in Myanmar ram chung hmunram zatuak 60 kan uk khawh cang,” tiah NUG Minister zung in chimnak nawlngei Nay Bone Lat nih April 30 ah tuah mi Press Conference ah a chim.
Kahdohnak kalpi mi ah tlangcung hriamtlai phu le Central Command i fonh in Committee ser a si kong zong U Nay Bone Lat nih a chim i, NUG le tlangcung hriamtlai phu pawl nih kahdohnak kong ah a biapi ah kan chiah i kan i sel mi Naypyidaw, Pyin Oo Lwin le Kah-Pah-Sah hriamnam sernak sehzung pawl zong kan kah khawh pin ah pehzulh in Operation kalpi ding in timhlamhnak an ngeih kong zong a chim chih.
“NUG nih a uk mi hmunram hna ah mizapi ca ah humhimnak latu Pah-Kah-Phah, Pah-Lah-Phah dirh a si hlei ah a dik mi phung sernak ca ah Pah-Ah-Phah phu dirh a si i zatlang ukhruainak kalpi a si. Cu pin ah tlangcung hriamtlai phu nih an uk mi hmunram hna ah zatlang ukhruainak ca ah Committee dirh a si,” tiah NUG Minister in chimnak nawlngei nih a chim.
Institute for Strategy and Policy–Myanmar nih April 13 ni an langhter mi ah Lwegel, Muse, Chinshwehaw, Mese, Rih le Myawaddy tiin ramri chawlehnak lampi 6 cu tlangcung hriamtlai phu le dohthlennak a tuahtu phu nih an uk khawh, tiah an thanh. The Chin Post
Thawngpang dang: Hpasawng peng, ah SAC nih thla 2 chung tluk ralphaw ah an tlaihkhih mi hna tualchung mi 18 cu SAC nih an chuah ṭhan hna tiah Karenni ramkulh, Hpasawng PDF chungin ṭuanvo ngeitu pakhat nih a chim.
2024, April 29 ah SAC ralhrang nih an chuah ṭhan mi hna tualchung mi 18 hi kum khua upa, naupawi le ngakchia deuh hna an si i PDF nih hmunhimnak hmun ah an chiah hna tiah an langhter.
Ralphaw ah tlaihkhih mi hna hi SAC ralhrang nih a phun phun in an ṭhihphaih hna caah tualchung mi 10 an taang rih tiah theih a si.
April 23 zong ah Hpasawng khuapi, Kwetthit sang Phungki sianginn ah aa taap mi tualchung mi 130 leng cu Karenni ṭangṭi phufonh nih an rak chanhchuah hna.
2024, February 29 ah thawk in Hpasawng khuapi kahdohnak ah SAC ralhrang hrambunh sakhan tampi cu Karenni ṭangṭi phufonh nih an laak khawh cang tiah theih a si.
Leave a Reply