CNA nih Carmel Tlang ZRA Sakhaan an Laak. Tedim peng Carmel Tlang ZRA sakhaan cu CNA ralkap pawl nih tlamtling te in an laak khawh, tiah thawng kan theih.
May 1 in May 3 tiang ZRA le CNA cu Tedim peng ah an i kap i, Laitu pawng ah a um mi ZRA Outpost pakhat cu CNA ralkap pawl nih an laak hnu ah Muallum khua pawng, Carmel tlang ah a um mi ZRA sakhaan cu tlamtling te in an laak khawh a si, tiah CNA he naihniam sin in kan theih.
ZRA sakhaan an laak mi ah Lai meithal pakhat, kutser chom mortar bomb kahnak (Launcher) pahnih, kuan tampi le a dangdang raldohnak thilri tampi cu CNA nih an laak. Kap hnih kahdohnak ah aa hliam mi le a thi mi an um tiah thawng a leng nain The Hakha Post nih cun dikthliar in kan thei kho rih lo. The Hakha Post
Thawngpang dang: Tukum, 2024, April thla dongh ah tuah mi Chinland Council meeting ah chungtel thar pathum an cohlan hna tiah theih a si. Cu hna cu Mindat Council, Kanpetlet Council le Zanniat People Organization hna an si.
CDF-Mindat le CDF-Kanpetlet in cheukhat cu Chin Brotherhood ah an lut nain a tam deuh cu Chinland Council ah an lut ve. Mipi uknak in Chinland Council ah a lut mi zong hi anmah peng ah cun mipi tam deuh nih dirkamh mi le cohlan mi an si tiah Chinland Council in upa pakhat nih The Chin Post ah a chim.
Tutan meeting ah chungtel thar pathum an cohlan mi he cun Chinland Council ah aa tel mi dihlak phu 18 an si cang. Cu hna cu:
Tonzang Township Council, Hakha Central Council, Thangtlang Township Council, Matupi Township Council, Paletwa Council, Hualngoram People Organization, Senthang Central Council, Zopheiram Council, Lautu People Affairs Council, Zotung Federal Council, Maraland Council, Mindat Council, Kanpetlet Council, Zanniat People Organization, CDF KKG, CDM Siyin, CDF- Dai
le People Defense Army (PDA, Tedim) hna an si. Hmanthlak: A hnubik CC Meeting le CC chungtel dihlak cazin. The Chin Post
Leave a Reply